Եվրոպայի խորհրդարանում «Իրադրությունը Լեռնային Ղարաբաղում Ադրբեջանի հարձակումից հետո եւ Հայաստանի նկատմամբ շարունակվող սպառնալիքները» թեմայով քննարկման ժամանակ ֆրանսիացի պատգամավոր Նաթալի Լուազոն դատապարտել է Եվրոպայի «բացակայությունը» մի քանի ամիս, երբ Լեռնային Ղարաբաղի հայերը շրջափակված էին ու սովամահ էին լինում, իսկ վերջնահաշվով ենթարկվեցին Ադրբեջանի հարձակմանը։
«Իհարկե, էթնիկ զտման պատասխանատու երկիրը Ադրբեջանն է եւ նա պետք է պատասխանատվության ենթարկվի, իսկ Ալիեւի ռեժիմի դեմ պատժամիջոցներ պետք է կիրառվեն։ Եվրոպայի միջնորդությունը ձախողվել է նաեւ այն պատճառով, որ այն չեզոք էր մնում»,-ասել է Լուազոն՝ հիշեցնելով, որ եթե դու անարդարության ժամանակ չեզոք ես մնում՝ նշանակում է, որ անցնում ես ագրեսորի կողմը։
Լուազոն նաեւ հիշեցրել է, որ Եվրախորհրդարանը բազմիցս նշել է Լեռնային Ղարաբաղին սպառնացող վտանգի մասին, սակայն դրա կանխարգելման ուղղությամբ ոչ մի գործնական քայլ չի արել։
Եվրախորհրդարանի պատգամավորը նաեւ զգուշացրել է Ադրբեջանի եւ Թուրքիայի կողմից Հայաստանի նկատմամբ սպառնալիքների մասին․ «Մենք պետք է պաշտպանենք մեր պատիվն ու Հայաստանը»,-եզրափակել է Լուազոն։
Կարդացեք նաև
Առողջապահության եւ պարենային անվտանգության հարցերով հանձնաժողովի կոմիսար Ստելլա Կիրիակիդեսը դատապարտել է Ադրբեջանի ագրեսիան, չնայած Բաքվի այն հավաստիացումներին, թե հակված է դիվանագիտական լուծումների։
«Ուժի կիրառումը երբեք չի կարող արդարացվել»,-ասել է կոմիսարը։ Նա պնդել է, որ Հայաստան բռնի տեղահանված Լեռնային Ղարաբաղի հայությունը պետք է անվտանգ իր տուն վերադառնալու իրավունք ունենան, իսկ Ադրբեջանը պետք է երաշխավորի Լեռնային Ղարաբաղում մնացած հայերի անվտանգությունը։
Աշոտ ՀԱԿՈԲՅԱՆ
