Սիրված երգիչ Արկադի Դումիկյանը օրերս շքեղ եւ մասշտաբային մենահամերգ է ունեցել Լոս Անջելեսի հանրահայտ Peacock դահլիճում։ 2007 թ. հոկտեմբերին բացումից ի վեր՝ Peacock թատրոնը հյուրընկալել է ամենահայտնի արտիստների համերգներ, որոնց թվում են՝ Ալան Ջեքսոնը, Քեթի Փերին, Չարլի Ուիլսոնը, Խուան Գաբրիելը, Արետա Ֆրանկլինը, Էդ Շիրանը, Ջոն Ֆոգերտին, Մարկ Էնթոնի, Ջոն Լեջենդը, Քելլի Քլարկսոնը, Յանին, Նիկի Մինաժը։
Ինչ վերաբերում է Արկադի Դումիկյանին, նա իր թիմի հետ մենահամերգին նախապատրաստվել էր ամենայն մանրամասնությամբ՝ հաշվի առնելով համերգի հետ կապված յուրաքանչյուր դետալ: Երգիչը կարեւորում է սիրելի հանդիսատեսին ըստ արժանվույն ներկայանալը: Արկադի Դումիկյանի բեմ բարձրանալու առաջին իսկ պահից երկրպագուներն իրենց ծափերով անդադար աջակցում էին նրան, երգում երգչի հետ։
Arkadi Dumikyan Sold out՝ այս նախադասությունն էր գրված վկայականի մեջ, որը երգիչը ստացավ Լոս Անջելեսի քաղաքային խորհրդի կողմից՝ Peacock դահլիճում sold out մենահամերգ ունենալու առիթով: Դումիկյանը հանդիսատեսին ներկայացավ իր հին ու նոր կատարումներով՝ բարձր տրամադրություն պարգեւելով ներկաներին:
«Այն էներգիան, որը ստացա հանդիսատեսից, ամենաթակն է ինձ համար: Ես աշխատում եմ հենց այդ էներգիայի ու դրական լիցքերի համար»,- մեզ հետ զրույցում նշեց երգիչը՝ ունկնդրի հետ այս հանդիպումն ու մենահամերգը որակելով անկրկնելի:
Հավելենք, որ Հայաստանի սահմաններից դուրս ունենալ sold out համերգ՝ ոչ բոլոր արտիստներին է հաջողվում, իսկ Արկադի Դումիկյանը այն բացառիկ երգիչներից է, ով կարողացավ նման արդյունքների հասնել՝ իր տաղանդի և աշխատասիրության շնորհիվ։
Համերգի կազմակերպիչ ու պրոդյուսեր Լեւոն Չախոյանի խոսքով համերգի նախապատրաստական աշխատանքները տեւական են եղել. «Peacock-ը համարվում է ԱՄՆ-ի ամենամեծ դահլիճներից մեկը, երկար բանակցություններից հետո նոր միայն կարողացանք ամրագրել մեր համերգի օրը, քանի որ իրականում, առանց ավելորդ սեթևեթանքի պետք է նշեմ, որ ամեն մի աստղի բախտ չի վիճարկվում ելույթ ունենալ այս դահլիճում: Արկադի Դումիկյան երգիչը այն հազվագյուտներից է, որ կարող է ասել, որ ինքը այդ բեմում եղել է ու համերգին գեթ մեկ չվաճառված տոմս չի եղել »։
Անի ՍԱՐԳՍՅԱՆ
