Հակակոռուպցիոն դատարանում, դատավոր Վահե Դոլմազյանի նախագահությամբ, Հայաստանի ֆիզիկական կուլտուրայի եւ սպորտի պետական ինստիտուտի նախկին ռեկտոր Դավիթ Խիթարյանի գործով այսօրվա դատական նիստը մյուս երկու մեղադրյալների՝ Անժելա Բեգլարյանի, Արմեն Վազգենյանի եւ նրանց փաստաբանների չներկայանալու պատճառով հետաձգվեց անորոշ ժամանակով: Դատավոր Վահե Դոլմազյանը դատախազին, նիստին ներկայացած Դավիթ Խիթարյանին եւ նրա փաստաբանին տեղեկացրեց, որ հաջորդ նիստի օրվա եւ ժամի մասին կտեղեկացվի լրացուցիչ:
Դավիթ Խիթարյանը մեղադրվում է ենթադրյալ պաշտոնական փաստաթուղթ կեղծելու համար: «Մենք՝ ես եւ իմ փաստաբանը, ներկա փուլում նպատակահարմար չենք համարում խոսել: Սակայն կարող եմ ասել, որ ինձ ներկայացված մեղադրանքը չեմ ընդունում եւ հույս ունեմ, որ դատարանում դա կապացուցվի»,-Aravot.am-ին ասաց Դավիթ Խիթարյանը:
Աշոտ ՀԱԿՈԲՅԱՆ
