«ԵԽԽՎ-ում առկա ռասիզմի, ադրբեջանաֆոբիայի և իսլամաֆոբիայի ներկայիս անտանելի մթնոլորտի պայմաններում Ադրբեջանի պատվիրակությունը որոշում է դադարեցնել իր ներգրավվածությունը և ներկայությունը ԵԽԽՎ-ում մինչև հետագա ծանուցում»,- արձանագրված է ԵԽԽՎ-ում ադրբեջանական պատվիրակության տարածած հաղորդագրությունում։
Ադրբեջանական պատվիրակության հայտարարության տեքստը ԵԽԽՎ-ի կայքում չգտանք։ Apa.az-ի փոխանցմամբ՝ հայտարարության տեքստում նաև նշված է, թե, ցավոք, ԵԽԽՎ-ն օգտագործվում է որպես հարթակ՝ թիրախավորելու որոշ անդամ երկրներ․ «ԵԽԽՎ-ի հիմնական սկզբունքներն օգտագործվում են որոշակի կողմնակալ խմբերի կողմից՝ իրենց նեղ շահերն առաջ տանելու համար: ԵԽԽՎ-ում գերակշռող պրակտիկա են դարձել քաղաքական կոռուպցիան, խտրականությունը, էթնիկ և կրոնական ատելությունը, երկակի ստանդարտները, մեծամտությունը, շովինիզմը»։
Նշենք, որ ԵԽԽՎ-ն ադրբեջանական պատվիրակության հավատարմագրերը չհաստատելու ընթացակարգ էր սկսել։ Սակայն ադրբեջանական պատվիրակության անդամները չսպասեցին այս թեմայով քննարկմանն ու քվեարկությանը, որ քիչ անց տեղի կունենա Ստրասբուրգում։
Տաթև ՀԱՐՈՒԹՅՈՒՆՅԱՆ
