Այսօր լրագրողները իր պաշտոնավարման մեկ տարին ամփոփող Շիրակի մարզպետ Մուշեղ Մուրադյանին հարցրեցին՝ եթե վարչապետ Նիկոլ Փաշինյանն այցելի Շիրակի մարզ ու ստուգի պետական ծրագրով իրականացվող շինարարության ընթացքը, ասենք՝ դպրոցաշինությունը, ճանապարհաշինությունը, պաշտոնանկություններ կամ հրաժարականներ կլինե՞ն նրա այցից հետո։
Շիրակի մարզպետը պատասխանեց․ «Լրատվամիջոցների հարգելի ներկայացուցիչներ, եթե Շիրակի մարզում որևիցե պետական մեկ դրամի ծախս կա, եթե այդտեղ կան խախտումներ, թերություններ, մեր կառավարությունը տեղյակ է։
Եթե կան խախտումներ, դրանք մեր կողմից բարձրաձայնված են ժամանակին և տրված են հստակ հանձնարարականներ։
Ինչպես ես, այնպես էլ մարզպետի աշխատակազմը, մշտական հանձնաժողովը հետևողական ենք, չկա որևէ շինհրապարակ, որևէ բնակավայր, տարածք, որտեղ պետական մեկ լումա ծախսվի, դրա հետևից չգնանք։
Կարդացեք նաև
Այն բոլոր թերությունները, որոնք մեր հնարավորությունների, լիազորությունների շրջանակներում են և ըստ պայմանագրերի, ըստ կատարած աշխատանքի, ըստ որակի՝ ինչ որ մենք արձանագրում ենք, բոլորը փաստաթղթային կա՝ ուղղված պատկան մարմիններին։
Ասեմ նաև, որ դեռևս դեկտեմբեր ամսին այն շինարարական աշխատանքները, որոնք մարզում իրականացվում են և դանդաղ է ընթացքը, որակը, մեզ չի գոհացնում, այս մասին մենք պատկան մարմիններին գրություններ ունենք ուղղված՝ Տարածքային զարգացման հիմնադրամին, Քաղաքաշինության կոմիտեին։
Պարբերաբար ահազանգում ենք, պահանջում ենք, հրավիրում ենք իրենց աչքով տեսնելու, թեպետ Տարածքային կառավարման նախարարությունը մեր հետ մշտապես այս ամբողջ պրոցեսի մեջ է՝ ստուգումների, հսկողության մեջ առկա է, գալիս են, մշտապես մեր հանձնաժողովների հետ աշխատում են, ես էլ եմ շրջում, իմ հետ քննարկում են։
Այսպես ասեմ՝ այնտեղ, որտեղ թերություն կա, դա չի կարող չբարձրաձայնվել,դա չի կարող չշտկվել»։
Նունե ԱՐԵՎՇԱՏՅԱՆ
