«Ի՞նչ եք կարծում ԱԱԾ աշխատակիցը կամ ՊՆ-ն ինչ գործ ունի դռելով, էդ ինչ հեքիաթներ եք հորինում, առանց այն էլ վատ ենք: Այո, լրատվամիջոցներն ինչ ասես գրում են, ում խելքն ինչ փչում է՝ այն է գրում: Ոչինչ ասել չեմ կարող, միայն կարող եմ ասել, որ այդ ամեն ինչը սուտ է, իրականությանը չհամապատասխանող . այդքանը, էլ հարցեր մի տվեք»,-այս մասին Aravot.am-ին ասաց Տավուշի մարզի Չինարի գյուղի դպրոցի պատմության ուսուցչուհի Հրածին Ապերյանը ու անջատեց հեռախոսազանգը:
Նրա ավագ դուստրը՝ Հեղինե Աղասյանը, ըստ լրատվամիջոցների, մայիսի 25-ին Երեւանի հյուրանոցներից մեկում Բագրատ սրբազանին գաղտնալսելու սարք տեղադրելու համար հատուկ աշխատանքներ է տարել:
Հիշեցնենք, որ տելեգրամյան տարբեր ալիքներով ու տարբեր լրատվամիջոցներով տեղեկություններ շրջանառվեցին, որ «ժուչոկ» դնող Հեղինե Աղասյանը ցանկացել է հյուրանոցի սենյակի առաստաղը ծակելու միջոցով սարք դնել Բագրատ Սրբազանին գաղտնալսելու համար: Ըստ լրատվամիջոցների՝ Հեղինեն Երեւանում Խաչատուր Աբովյանի մանկավարժական ինստիտուտն ավարտելուց հետո աշխատանքի է անցել ՊՆ-ում, այնուհետեւ մտել է ԱԱԾ:
Կարդացեք նաև
Մեր տեղեկություններով, Հեղինեի մայրը՝ Հրածին Ապերյանը, այսօր աշխատանքի չի գնացել ու դպրոցից իր բացակայելու մասին տեղեկություն ստանալու համար երկար զանգերից հետո միայն հաղորդագրությամբ պատասխանել է, որ վատառողջ է:
«Ամենազարմանալին այն է, որ Բագրատ Սրբազանն այս ընտանիքին աջակցել է բազմիցս` երբ Հեղինեի մայրը բուժվում էր քաղցկեղից: Հովանավորել է նաեւ Հեղինեին` ուսման վարձավճարի հարցում».- գրել էր «Հրապարակը»:
Արփինե ՍԻՄՈՆՅԱՆ
