Գալիք՝ 2025 թվականի մասով «Հայ ազգային կոնգրես» կուսակցության փոխնախագահ Լեւոն Զուրաբյանը շատ վատատես չէ։ Ժամանակ կա եւ նա հուսով է, որ հետաքրքիր լուծումներ կգտնվեն ընդդիմադիր քաղաքական նոր ուժերի ասպարեզ գալու համար, 2025-ին էլ կդառնա ՀՀ քաղաքական համակարգի առողջացման հիմք դնելու տարի։
Այս մասին իր տեսակետները ՀԱԿ փոխնախագահը ներկայացրեց այսօր «Սպուտնիկ Արմենիա» մամուլի սրահում կայացած ասուլիսում՝ հավելելով, որ այդ ուղղությամբ աշխատում են։
Լեւոն Զուրաբյանի դիտարկմամբ, իշխանությունը պատրաստվում է ընտրությունների, բայց ոչ արտահերթ, այլ 2026 թվականի հերթական ընտրություններին։
Աշխարհաքաղաքական զարգացումների համատեքստում անդրադառնալով Վրաստանում տեղի ունեցող հետընտրական գործընթացներին, Լեւոն Զուրաբյանը նկատեց, որ խնդիրը Վրաստանում տեղի ունեցած ընտրությունները չէին, քանի որ դրանք անհամեմատ ավելի լավն էին, քան Ադրբեջանի ընտրությունները, որոնք ողջունվեցին միջազգային հանրության կողմից։ Խնդիրն, ըստ նրա, այն է, որ «Վրաստանում աշխարհաքաղաքական օպերացիա» է տեղի ունեցել՝ ոչ թե ընտրություններ ու իրադրությունը սրեց Վրաստանի իշխանությունը՝ հայտարարելով, որ դադարեցնում է եվրոպական ինտեգրման ուղղությունը, ինչի հետ վրացի ժողովուրդն արդեն խնդիր տեսավ։
Կարդացեք նաև
«Թե ինչո՞վ կավարտվի ամեն ինչ, անկանխատեսելի է։ Տա Աստված, որ ամեն ինչ ընթանա առանց ներքին բախումների»,- ասաց Լեւոն Զուրաբյանը՝ հավելելով, որ Հայաստանի համար ևս կարեւոր է Վրաստանում կայունությունը։
Մանրամասները՝ տեսանյութում
Նելլի ԳՐԻԳՈՐՅԱՆ
Լուսանկարը՝ արխիվային
