«Հայրենիք» կինոթատրոնի սեփականատիրոջ և թաղապետարանի աշխատակիցների միջև վեճ է ծագել ու քաշքշուկ եղել։
«Բարգավաճ Հայաստան» կուսակցության պատգամավորի թեկնածու Գևորգ Ստեփանյանը արձագանքել է Շենգավիթի միջադեպին և մանրամասներ պատմել։
«Իմ նկարն ու «Բարգավաճ Հայաստան» կուսակցության պաստառը փակցված է եղել «Հայրենիք» կինոթատրոնի վրա։ Սեփականատերը թույլ է տվել, ու մենք փակցրել ենք։ Մեզ ասացին, որ Շենգավիթ վարչական շրջանի աշխատակիցները ագահորեն մոտեցել են ու առանց սեփականատիրոջը հարցնելու՝ պոկել են պաստառը, նետել։ Ինձ հասած տեղեկություններով՝ սեփականատիրոջը հայհոյել են, որի արդյունքում սեփականատիրոջ և թաղապետարանի աշխատակիցների միջև վեճ է ծագել ու քաշքշուկ»,– պատմեց նա։
Ստեփանյանի խոսքով՝ եթե իրենց նորմալ զգուշացնեին, որ պետք է փոխվեն պաստառի չափսերը, իրենք դա կանեին, այլ ոչ թե նման իրավիճակ ստեղծեին։ Նա վստահեցրեց, որ ոչ մի սադրանքի չեն տրվելու։
