Անդրադառնալով ԱԺ-ում Նիկոլ Փաշինյանի անհավասարակշիռ ելույթին եւ հայտարարություններին՝ «Մայր Հայաստան» կուսակցության անդամ Մանուկ Սուքիասյանը «Հայելի» ակումբում ասաց. «Նախընտրական շրջանում մենք դրանից ոչ պակաս, մի բան էլ՝ ավել, անհեթեթ եւ անընդունելի բնորոշումներ ենք լսել իր քաղաքական հակառակորդների հասցեին։ Այնպես որ, ինձ թվում է՝ վաղուց ժամանակն է, որ մեր հասարակությունը իմունիտետ ձեռք բերի այս անհավասարակշիռ մարդու տարբեր նմանօրինակ դրսեւորումների նկատմամբ։
Բովանդակային առումով ինքը լավ գիտի, որ ընտրությանը մասնակցած քաղաքացիների կեսից ավելին իրեն ձայն չի տվել եւ ինքը չունի սահմանադրական մեծամասնություն։ Ասեմ ավելին։ Եթե իրենք արդեն սկսել են խոսել այն մասին, որ պիտի 300 հազար ստորագրություն հավաքեն, որ գնան հանրաքվեի, այդ օրակարգի հարցն ո՞վ էր բերել օրակարգ՝ թուրք-ադրբեջանական տանդեմը։
Ենթադրում եմ՝ Հաջիեւի հետ այդ հանդիպումը իր հանձնարարականով Արմեն Գրիգորյանը անցկացրել է զուտ հավաստիացնելու համար, որ ոչինչ, որ մենք չունենք սահմանադրական մեծամասնություն։ Սպասեք, մենք ստորագրահավաքով կգնանք հանրաքվեի եւ մեր ստանձնած պարտավորությունները կկատարենք»։
Աշոտ ՀԱԿՈԲՅԱՆ
