Ամենայն հայոց կաթողիկոս Գարեգին Բ-ի եղբոր՝ Գևորգ Ներսիսյանի և եղբորորդու՝ Համբարձում Ներսիսյանի գործով դատական նիստում այսօր դատարանը որոշեց բավարարել փաստաբանի միջնորդությունը և բարելավել Գևորգ Ներսիսյանի խափանման միջոցի պայմանները։
Այս մասին Aravot.am-ի հետ զրույցում ասաց փաստաբան Էմին Խաչատրյանը։
Հաշվի առնելով Գևորգ Ներսիսյանի առողջական վիճակը, բժշկական հետազոտություն անցնելու անհրաժեշտությունը՝ դատարանը վարչական հսկողություն սահմանեց՝ Հայաստանի Հանրապետության տարածքում ազատ տեղաշարժվելու իրավունքով։ Նախկինում տեղաշարժը սահմանափակված էր Ոսկեհատ համայնքի տարածքով։
Նախորդ նիստում դատարանը մերժել էր նույն միջնորդությունը։ Այսօր միջնորդության բավարարումը փաստաբանը պայմանավորում է այն հանգամանքով, որ գործով հիմնական դատալսումների փուլն ավարտվեց, և դատարանն այսօր անցավ եզրափակիչ ելույթներին. «Քանի որ այլևս դատավարական գործողություններ չկան կատարելու, դատարանը որոշեց, որ խոչընդոտելու ռիսկը նվազել է»։
Կարդացեք նաև
Այս գործով այսօր մեղադրող կողմը հանդես է եկել եզրափակիչ ելույթով։
«Եթե մի քիչ անհամեստ գտնվեմ, իրականում ես չէի սպասում, որ դատախազը նման եզրափակիչ ելույթ կունենա. ելույթը 3-4 էջ էր։ Զավեշտ է, բայց դա է։ Նմանատիպ գործով, այն էլ այս ծավալի մեջ, երբ մարդկանց այսքան ժամանակ անազատության մեջ պահեցին… 4 էջ եզրափակիչ ելույթ…»,- ասաց փաստաբանը։
Հարցին՝ սա հուսադրո՞ւմ է պաշտպանական կողմին այն իմաստով, որ իրենք ավելի լավ դիրքերում են հայտնվում, Էմին Խաչատրյանը պատասխանեց. «Մյուս կողմից էլ՝ ուզում է 20 էջ ելույթ ունենային, մենք մեր պնդումները, հստակ դիրքորոշումն ունենք և առաջին օրից պնդում ենք, որ այստեղ հանցադեպ չկա։ Իմ ասածների ապացույցը կհնչի հաջորդ նիստում՝ մեր եզրափակիչ ելույթի ժամանակ»։
Նելլի ԳՐԻԳՈՐՅԱՆ
