«Նոր չէ, որ անոնսվել է, որ ճնշումները սաստկանալու են։ Այդ ճնշումների լրացուցիչ մոտիվացիա իշխանություններին տվեց այն հսկայական քվեն, որ ստացավ ընդդիմությունը»,- այսօր լրագրողների հետ զրույցում ասաց ավագանու «Մայր Հայաստան» խմբակցության ղեկավար Մանուկ Սուքիասյանը։
Անդրադառնալով ԲՀԿ առաջնորդ Գագիկ Ծառուկյանի տանն ու նրան պատկանող ընկերություններում վաղ առավոտից իրականացվող խուզարկություններին՝ Սուքիասյանն ասաց, որ դա ոչ թե ֆաշիզմի, այլ «փաշիզմի» դրսևորում է։
«Սա փաշիզմ է՝ քաղաքական ընդդիմախոսներին ամեն կերպ լռեցնելու և սեփական ձախողումների օրակարգը դեպի քաղաքական հակառակորդներն ուղղելու իշխանական մարմաջը։ Ոչ մի արտառոց բան չկա։ Մարդը պատրաստվում է Ալիևի պահանջով մեր երկրի Սահմանադրությունը փոխել, ուրանալ Անկախության հռչակագիրը, խարխլել ՀՀ Երրորդ հանրապետության հիմքերը։ Ահա այդ ճանապարհին է, որ բոլոր դիմադրության օջախները պետք է վերացնի։ Ընտրությունները միջակայք էին, շան գլուխը թաղված է Սահմանադրության փոփոխություններ կոչված «աֆյորայի» տակ։ Հարցերի հարցն այն է, որ իրենք առ այսօր թաքուն են պահում այդ նախագիծը։ Եթե վախենալու ու թաքցնելու բան չունեն, ինչո՞ւ են թաքցնում այդ նախագիծը։ Շատ լավ գիտեին, որ եթե ընտրություններից առաջ հրապարակեին այդ նախագիծը, ժողովրդի համար ակնհայտ կլիներ, որ այն մեկին մեկ պարունակում է Ալիևի պահանջներով կազմված Սահմանադրություն»,- ասաց նա։
Կարդացեք նաև
Սուքիասյանի խոսքով՝ իշխանություններին պետք է մարդկանց կեղծիքներով ու տեսարաններով կերակրել, ժամանակ ձգել և ընդդիմության կենսունակ օջախները քայքայել, ինչն էլ անում են։
«Այս նեգատիվ էներգիան, որ ներարկվում է հասարակության մեջ, զսպանակի էֆեկտով հետ է վերադառնալու։ Մի օր այս ամենը հեղեղելու է փողոցներն ու այս իշխանություններին սրբի-տանի»,- ասաց Սուքիասյանը և նրա հենց այս պնդման վրա էլ ոստիկանական մեքենայի ազդանշանը միացավ։
Հիշեցնենք, որ վաղ առավոտից խուզարկություններ են սկսվել Ծառուկյանի առանձնատանը, բիզնեսներում:
Արփինե ՍԻՄՈՆՅԱՆ
