«Ո՞նց է ստացվել, որ սրանք մնում են: Սրանք մի արդարացում են գտել՝ ճիշտ է ժողովուրդ ջան, թալանում ենք, կազինո էլ ենք գնում, բայց զատո Ղարաբաղը պահում ենք: Դիվանագիտական ասպարեզում մեր կոշտ դիրքորոշումներով Ղարաբաղը պահում ենք: Այս թեման ես բացում եմ, որովհետեւ նոր եմ վերադարձել Ստրասբուրգից, որտեղ ՀՀ իշխանությունը կրել է իր պատմության գուցե ամենախայտառակ պարտություններից մեկը»,- այսօր Վանաձորում ոչ իշխանական երեք ուժերի հանրահավաքին իր ելույթում ասաց ՀԱԿ խմբակցության ղեկավար Լեւոն Զուրաբյանը:
Նա տեղեկացրեց վանաձորցիներին, որ ԵԽԽՎ-ն որոշել է պատրաստել զեկույց՝ «Բռնության ահագնացում ԼՂ-ում եւ Ադրբեջանի այլ օկուպացված տարածքներում» վերնագրով. «Այս վերնագրից հետեւում է, որ ԵԽԽՎ-ն համարում է ԼՂՀ-ն Ադրբեջանից օկուպացված տարածք: Մի բան, որ երբեք փաստաթղթերում ձեւակերպած չի եղել: Խոսել են այդ մասին, բայց նման բան չի եղել: Սրա միակ պատասխանատուն անգրագետ, թալանչի իշխանությունն է: Սրանք Ղարաբաղը պահողը չեն, սրանք Ղարաբաղը ծախողն ենք, տվողն են: Սրանք այնպես են անում, որ մեր երկիրը կորցնում է դիմակայելու որեւէ ռեսուրս»:
Լեւոն Զուրաբյանը հիշեցրեց, որ երբ Լեւոն Տեր-Պետրոսյանը վերադարձել էր ակտիվ քաղաքականություն, իշխանությունները հակաքարոզչություն տանելիս ասում էին, թե նա Ղարաբաղը կտա. «Խաբեցին մարդկանց, ասեցին, թե գիտեք, Լեւոնը գալիս է Ղարաբաղը տալու: Շատերը հավատացին, որ եթե իրենք չլինեն իշխանություն, Ղարաբաղը տալու է: Իրենք այսօր կորցրեցին այդ վերջին հաղթաթուղթը: Այլեւս ոչ ոք չի մտածում նրանց մասին՝ որպես Ղարաբաղը պահող: Այնպես որ, Հովիկ Աբրահամյաններ, Սերժ Սարգսյաններ, մեզ չվախեցնեք: Հլա տեսնենք, որ ժողովուրդը կանգնի, ո՞ւր եք փախնելու, ո՞ր մկան ծակը»:
Նա հորդորեց հավաքվածներին գիտակցել ժողովրդի ուժը, որը պետք է արտահայտվի հոկտեմբերի 10-ին եւ նաեւ իշխանափոխությունից հետո. «Ապացուցեք, որ այս երկրի բախտը գտնվում է ձեր ձեռքում: Ուրեմն հանուն Հայաստանի անվտանգության, պաշտպանունակության, հանուն արդարության, օրինական պետության, բոլորդ հոկտեմբերի 10-ին ցույց տվեք ժողովրդի ուժը: Երբ ցույց տաք այդ ուժը, բոլորդ գոռալու ենք՝ Սեր-ժիկ, հեռացիր, Սեր-ժիկ, հեռացիր»:
Կարդացեք նաև
Վանաձորի հանրահավաքը բավականին բազմամարդ էր, ուստի Տիգրան Ուրիխանյանն ասաց՝ հիմա գիտե՞ք ոնց են մղկտում իշխանությունները՝ տեսնելով, թե ինչպես եք այս եղանակին կանգնել:
Հռիփսիմե ՋԵԲԵՋՅԱՆ
