Ի՞նչ են ֆիքսել «Արգո» խանութի տեսախցիկները ռուս զինծառայողի սպանությունից. նոր մանրամասներ (Տեսանյութ, ֆոտոշարք)

Ի՞նչ են ֆիքսել «Արգո» խանութի տեսախցիկները ռուս զինծառայողի սպանությունից. նոր մանրամասներ (Տեսանյութ, ֆոտոշարք)

Այսօր եղանք Գյումրու Բուլվարային թաղամասում, որտեղ երկու օր առաջ ժամը 17.00-ի սահմաններում տեղի էր ունեցել պայմանագրային ռուս զինծառայող, 21-ամյա Դմիտրի Յալպաևի դաժան սպանությունը: Թաղի բնակիչները ցնցված էին այս դեպքից, դեռ ուշքի չեն գալիս: Անմիջական ականատեսներից մեկն էլ՝ «Շիրակջրմուղի» աշխատակից Սամվելը, որին պատկանող գրախանութի տակ տեղի էր ունեցել սպանությունը, բնակիչների փոխանցմամբ, դեպքից հետո տանը հիվանդ պառկած է, շատ վատ է զգում:

«Արգո» խանութի հարևանությամբ գտնվող գրախանութի տակ, որտեղ սպանել էին Դմիտրիին, թարմ ծաղիկներ, խաղալիք ու մոմեր էին դրված: Մեր՝ այնտեղ գտնվելու պահին կանգնեց մի ավտոմեքենա, որից դուրս եկան երկու ռուս կանայք՝ թարմ ծաղիկներ բերելով: Նրանք մեզ հետ զրույցում նշեցին, որ անձամբ ճանաչում էին Դմիտրիին, նա ոգելից խմիչքների նկատմամբ սեր չունեցող, օրինապահ զինվորական էր: Ռուս կանայք ասացին, որ սպանության տարբեր վարկածներ են լսել, սակայն չեն ուզում մանրամասնել: Նշեցին միայն, որ իրենց կարծիքով սա «պրովոկացիա է, հայ-ռուսական հարաբերությունները խառնելու միջոց»:

Փոխարենը որոշ մանրամասներ փոխանցեցին թաղի բնակիչները: Ստեփան Գրիգորյանը, որը թոշակառու է, տաք օրերին ամբողջ օրը կանգնած է Կուրսկի անվան բարեկամության պուրակի մոտակայքում ու ծանոթ է թաղի անցուդարձին, դեպքին ականատես չի եղել: Նա հասել է այն պահին, երբ շտապօգնության մեքենան կանգնել է, Դիման էլ հոգին է տվել: Նա լսել է, որ Դմիտրին «Արգո» խանութի դիմաց տեղադրված սուրճ պատրաստող սարքից սուրճ է վերցրել, այն ձեռքը բռնած՝ ամենայն բավականությամբ ուղևորվել է դեպի մոտակայքում տեղակայված զորամաս: «Արգո» խանութից մի քանի քայլ առաջ շարժվելով՝ վրա է հասել հոգեկան խնդիրներ ունեցող երիտասարդը ու դանակով հարվածել զինվորականի պարանոցին: Դմիտրին փորձել է իր պարանոցից հանել դանակը, սակայն ձեռքը պահած դանակին՝ ընկել է:

Դմիտրիին խփողը, տեսնելով, որ շուրջբոլորը իրար են խառնվել, փախուստի է դիմել, վազել է դիմացի նեղ փողոցներից մեկով (տես լուսանկարում), սակայն «Արգո» խանութի առաքիչներից մեկը, վազել է հետևից, կարողացել է հասնել, գետնին գցել նրան ու պահել:

Ըստ մեր զրուցակցի, Դմիտրին զորամասի շնապահն է եղել (հիշեցնենք, որ նրա՝ սոցիալական ցանցերում տեղադրված բոլոր նկարները տարբեր ցեղատեսակների շների հետ են, Ա.Ն.) շատ մարդամոտ ու շփվող անձնավորություն, նա զորամասից միշտ ուղևորվել է մոտակայքում՝ «Ձկի ձորի» հարևանությամբ գտնվող դիվիզիա՝ ճանապարհին բարևելով բոլորին: «Այս թաղի բնակիչները շատ էին սիրում Դմիտրիին, շատ խելոք, շնորհքով տղա էր, շատերը ունեին նրա հեռախոսահամարը, զանգահարում, շփվում էին հետը:

Մեծ հարգանք ուներ մեր թաղում: Ինքը ժամկետային զինծառայող էր, մեկ տարի Գյումրիում ծառայելուց հետո, իրեն՝ որպես լավ կադր, վերցրեցին պայմանագրային ծառայության: Չեք պատկերացնում ինչ սիրով էր ապրում Գյումրիում, ինչ մարդամոտ էր: Անիծվի նրան սպանողը, ասա դու ի՞նչ կապ ունես Գյումրիի հետ, ո՞վ ես դու, որ Ստեփանավանից հասար էստեղ, խայտառակեցիր մեզ: Ո՞վ կպատկերացներ, թե պատահական մեկը կողքից պիտի գար ու էս օյինը բերեր… Դիման որբանոցի երեխա է եղել, նրան Կրասնոդարում որդեգրել է մի կին: Այս աշխարհում այդ մորից բացի ոչինչ չուներ: Չգիտեմ Կրասնոդար կտանեն հուղարկավորելու, թե՞ կմնա Գյումրիում: Չեք պատկերացնի դիվիզիայի հրամանատարը ինչ ձևի էր ողբում, երբ տեսավ Դմիտրիին այդ վիճակում: Նրան ախր շատ են սիրել», -պատմեց Ստեփան Գրիգորյանը:

Մեր զրուցակիցը նաև պատմեց, որ երեկ սպանության մեջ կասկածվող երիտասարդին բերել են դեպքի վայր: «Ձեռքը կապած էր, վնասվել էր փախուստի ժամանակ, երեսին նայել չէր լինում, Հայաստանի քաղաքացու վիդ չկար վրեն, դեմքին նայողը կասեր, որ նրա հետ ինչ-որ մի բան էն չէ…Ցույց էր տալիս, թե որտեղ ու ինչպես է սպանել Դիմային, 15-20 րոպե էդպես՝ առանց գետինը մտնելու, ցույց էր տալիս»,-ասաց մեր զրուցակիցը:

Մենք եղանք նաև «Արգո» խանութում: Խանութի աշխատակիցները պատմեցին, թե ինչ են ֆիքսել իրենց տեսախցիկները, որոնք առգրավվել են ոստիկանության կողմից: «Կադրերում ռուս զինվորականը մեր խանութի դիմացից սուրճ է վերցնում, շարժվում դեպի գրախանութ: Կուրսկի հրապարակի կողմից գալով՝ նրա հետևից առանց շտապելու շարժվում է մի ջահել տղա՝ դանակը ձեռքին պահած: Հասնելով գրախանութի մոտ՝ նա հետևի կողմից դանակը խրում է ռուս տղայի պարանոցը, վերջինս չի էլ հասցնում հասկանալ՝ ի՞նչ է կատարվում: Կադրերով տեսանք, որ ջահելը մոտ 5 անգամ սառնասրտորեն հարվածում է դանակով զինվորականին: Երեկ էլ դրան բերել էին դեպքի վայր, հեռվից տեսանք, թե ինչպես էր ցույց տալիս իր գործողությունները: Դմիտրիին անձամբ չենք ճանաչել, որովհետև մեծ թվով ռուս զինվորականներ են առևտուր անում մեր խանութից, միայն այդ պահերին ենք շփվում հետները»,-ասացին խանութի աշխատակիցները:

Մենք հետաքրքրվեցինք, թե որքանո՞վ է ճիշտ թաղում տարածված այն վարկածը, թե Ա.Ջ.-ն, տեսնելով Դմիտրիի ձեռքին փող, որը նա փորձում էր տեղավորել գրպանում, դանակահարել է, որպեսզի գողանար: «Կադրերում նման բան չկար, ոչ մի փող»,- ասացին խանութի աշխատակիցները:

Ի դեպ, այս թաղամասն ամենաբանուկ տեղանքներից մեկն է, այստեղ է գտնվում վիճակագրական վարչությունը, Գյումրու թիվ 38 դպրոցը, ջրմուղը: Բնակիչները բողոքում էին, որ փողոցում որևէ անգամ հսկողություն չի եղել ոստիկանության կողմից, ոստիկանական հրեշտակները եկել ու հսկում են իրենց տեղանքը միայն այս դեպքից հետո: Մինչդեռ, ըստ նրանց, ինչ կասկածելի դեմք ասես չի անցնում իրենց փողոցներով. քիչ հեռավորության գտնվող «Մուշ» թաղամասում անօրինական հասարակաց տուն կա, որտեղ և այս թաղի բնակիչների համոզմամբ, հանգրվանել էր օրերս ռազմաբազայից անհետացած ռուս զինծառայողը:

Ի դեպ, Բուլվարային թաղամասի կանանց շրջանակում խոսակցություններ էին տարածվել, թե Ա.Ջ.-ն, նախքան Դմիտրիին սպանելը, ոտքերով, ձեռքերով խփել է Կուրսկի հրապարկում գտնվող եղևնիներին ու հայհոյանքներ հնչեցրել: Մտածել են, թե խմած մարդ է:

Հիշեցնենք, որ ոստիկանությունից Aravot.am-ին փոխանցել էին, որ Ա.Ջ-ն Լոռու մարզի Ստեփանավան քաղաքից է, նա դեպքի պահին եղել է միայնակ: Բնակվում է պապիկի հետ, թե ինչու էր այցելել Գյումրի, ինչն էր դրդել սպանել զինծառայողին, վերջինս, ոստիկանության «Մուշ» բաժնի աշխատակիցների փոխանցմամբ, երևակայական վարկածներ է առաջ քաշել, որը, բնականաբար, չենք հրապարակում՝ ելնելով նախաքննության շահերից:

Նունե ԱՐԵՎՇԱՏՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

 
Առցանց Առավոտի լուրերին facebook-ով բաժանորդագրվելու համար սեղմեք