Անցած կիրակի օրը,հունվարի լույս 14-ի գիշերը Տավուշի մարզի Աչաջուր գյուղի տարածքում անհայտ անձը կամ անձինք կոտրել են Մակարավանքի եկեղեցու մուտքի դուռը, մտել տաճար,թալանել գանձանակը: Հայ առաքելական եկեղեցու Տավուշի թեմի առաջնորդ Բագրատ եպիսկոպոս Գալստանյանին հարցրինք՝ շա՞տ գումար են գողացել: Նա ասաց, որ գանձանակում եղած գումարի չափը հայտնի չէ,գանձանակը ավելի քան 3 ամիս չէր դատարկվել: Թեմի առաջնորդն ասաց, որ գողերը ջարդել են Մակարավանքում գտնվող հուշանվերների ցուցափեղկը, հուշանվերները գետին գցել, շարժել են եկեղեցու խորանի արծաթե խաչը, սակայն այն չեն տարել: Նա ասաց, որ Մակարավանքում հոգեւոր ծառայություն է մատուցում Աչաջրում բնակվող Տեր Արշավիր քահանա Ասատրյանը, Մակարավանքում մոմ վաճառող աչաջրեցի Արմենը նաեւ վանական համալիրի պահակ է աշխատում:
Թեմի առաջնորդը հայտնեց , որ սա Մակարավանքից գողության 2-րդ դեպքն է, նախանցյալ տարի 2 անգամ Գոշավանքից է գողություն կատարվել: Նա չի կարծում, որ կատարված գողությունը եկեղեցու հանդեպ անբարյացակամ վերաբերմունքի հետեւանք է, պարզապես գողություն է, հանրապետության այլ վանական համալիրներում նույնպես, օրինակ`Հաղպատավանքում, գողություններ են կատարվել:
Մակարավանքից գողության դեպքի վերաբերյալ ոստիկանության Իջեւանի բաժինը քննություն է կատարում:
Ոսկան ՍԱՐԳՍՅԱՆ
