Դիմադրության ալիք
ՀՀ նախագահի հավանական այցին «Ազատություն» ռ/կ-ի հայկական ծառայությունը երեկ հաղորդել է, որ «Մուսավաթ» կուսակցության ղեկավար Իսա Ղամբարը քննադատել է Քոչարյանին Բաքու հրավիրելու՝ Ալիեւի նախաձեռնությունը։
Նույն տեսակետն ունի նաեւ Ադրբեջանի լիբերալ կուսակցության առաջնորդ Լալա Շոֆքեթ Հաջիեւան։ Դեմոկրատական կուսակցության գլխավոր քարտուղար Սարդար Ջալալօղլին ասել է. «Առնվազն անտրամաբանական է Ալիեւի ցանկությունը՝ նույն սեղանի շուրջ նստել մի մարդու հետ, որի նկատմամբ Ադրբեջանի դատախազությունը քրեական գործ է հարուցել»։ Իսկ Ժողճակատի փոխնախագահներից մեկը՝ Ֆազիլ Մուսթաֆաեւն ասել է, թե Ադրբեջանի նկատմամբ թշնամաբար տրամադրված անջատողականին Բաքու հրավիրելն անընդունելի է։
Խաղաղության եւ հակամարտությունների կարգավորման վերլուծական կենտրոնի տնօրեն Էլխան Մեխթիեւն «Ազատությանը» տված հարցազրույցում մասնավորապես ասել է. «Ադրբեջանում շատերը Քոչարյանին համարում են ադրբեջանական տարածքների գրավման եւ Խոջալուի խաղաղ բնակչության սպանդի կազմակերպիչ։ Շատերը նրան դիտում են որպես պատերազմի հանցագործ եւ պահանջում են դատել։ Չեմ կարծում, որ Քոչարյանն ընդունի հրավերը, քանզի տեղյակ է Ադրբեջանում տիրող տրամադրություններին»։
