Իմ առաջարկները
Իշխանական կառույցների եւ կուսակցությունների լուրջ հետազոտական աշխատանքը վերջապես տվեց իր առաջին արդյունքները: Կուսակցություններից մեկը, իր ողջ ինտելեկտուալ ներուժը լարելով, եկավ այն եզրակացության, որ մեր տնտեսական թերզարգացածության եւ ժողովրդի չքավորության պատճառը նախորդ իշխանության երկրորդ էշելոնի ներկայացուցիչների գոյությունն է: Օրինակ, գալիս են օտար եւ հատկապես սփյուռքահայ ներդրողները, ցանկանում են շենացնել մեր երկիրը, բարելավել ժողովրդի վիճակը, բայց դեմ են առնում ջեռուցման տնտեսությունը թալանած Վահագն Խաչատրյանին եւ քոռուփոշման վերադառնում իրենց երկրները: Կամ՝ ցանկանում է էներգետիկայի «անկախ» /կառավարության հրահանգները կատարող/ հանձնաժողովը իջեցնել էլեկտրաէներգիայի սակագները, բայց չգիտես որտեղից ծլում է Դավիթ Շահնազարյանը իր վաճառած BMW-ներով եւ, բռնելով հանձնաժողովի ձեռքը, ստիպում սակագները բարձրացնել: Մի խոսքով, անհրաժեշտ է անհետաձգելի միջոցառումների ազգային համալիր՝ այս իրավիճակը շտկելու համար:
Այստեղ ազգի ցավերով տառապող ցանկացած քաղաքացի պետք է հանդես գա իր առաջարկներով, ինչը եւ փորձում եմ անել: Հայոց պետականությունն ամրապնդելու, տնտեսության մեջ ինվեստիցիոն մթնոլորտը բարելավելու եւ բեկումնային զարգացում ապահովելու, բնակչությանը ծանր սոցիալական վիճակից դուրս բերելու նպատակով առաջարկում եմ.
– ցմահ բանտարկել Բաբկեն Արարքցյանին եւ Արշակ Սադոյանին՝ տեղադրելով նրանց միեւնույն բանտախցում,
Կարդացեք նաև
– «Հայաստանի հանրապետութիւն» օրաթերթում շարունակաբար տպագրել ՀՀՇ-ի «Բլե» գաղտնի կառույցի արխիվը,
– ազգայնացնել Հրազդանի հացի փուռը՝ այն վերանվանելով «Արյան ծով»,
– հնարավորություն տալ ՀՅԴ Բյուրոյի եւ ԳՄ-ի անդամներին՝ անվճար օգտվելու Վիգեն Խաչատրյանի կազինոներում վաճառվող ոգելից խմիչքներից,
– տարրալուծել ձեթօճառի կոմբինատը՝ օճառի նոր կոմբինատում համատեղության կարգով տնօրեն նշանակելով նախագահի խորհրդական Արամ Սարգսյանին,
– «Դալմայի բաղեր» թաղամասի բոլոր շինությունները սեփականաշնորհել միջազգային մրցույթով՝ «Մերի լինչ» ֆիրմայի միջնորդությամբ,
– վերականգնել Արա Սահակյանին ՀՀՇ շարքերում՝ խրախուսելով կուսակցությունը բարոյալքելու՝ նրա տեւական ջանքերը,
– Արարատ Զուրաբյանին վերանվանել «Նեմեց Ռուբո», իսկ Արամ Մանուկյանին՝ «Լեդի Հակոբ»:
ԱՐԱՄ ԱԲՐԱՀԱՄՅԱՆ
