Ինչպե՞ս է Ռոբերտ Քոչարյանը մեկնաբանում ՀՀՇ վարչության նախագահի եւ «Հանրապետություն» խմբակցության հայտարարությունները, թե Վանո Սիրադեղյանին կալանավորելու նախաձեռնությունը քաղաքական պատվերի արդյունք է։ Ինչպե՞ս է մեկնաբանում ԱԺ որոշումը՝ գլխավոր դատախազի միջնորդությունը մերժելու վերաբերյալ։ Պատրաստվո՞ւմ է արդյոք լուծարել խորհրդարանը։
«Առավոտի» այս հարցերին ի պատասխան՝ նախագահի մամուլի քարտուղար Վահե Գաբրիելյանն ասաց. «Իշխանությունները խոստացել էին, թե կարվի առավելագույնը, որ բացահայտվեն հանրությանն առավելապես հուզող հանցագործությունները եւ մեղավորները պատասխանատվության ենթարկվեն։ Շատ ցավալի է, սակայն, որ ԱԺ այս որոշումով, որի ողջ պատասխանատվությունն ընկնում է ՀՀՇ-ի եւ «Հանրապետություն» միավորման վրա, խոչընդոտվեց մի շարք հանցագործությունների վերաբերյալ դատական գործընթացը, որն իր հերթին լույս կսփռեր նաեւ այլ հանցագործությունների վրա։ Ցավալի է նաեւ, որ այն կուսակցությունները, որոնք երկար ժամանակ պահանջում էին պատասխանատվության կանչել այս հանցագործությունները պատվիրողներին եւ կատարողներին՝ այժմ այս պարզ քրեական խնդիրը փորձում են քաղաքական հարց դարձնել։ Դժվար է որեւէ այլ քայլ պատկերացնել, որն ավելի ուժգին հարված հասցներ արդարադատության նկատմամբ ժողովրդի հավատին։ Ինչեւէ, կձեռնարկվեն Սահմանադրությամբ եւ օրենքներով նախատեսված բոլոր անհրաժեշտ քայլերը, որոնք կապահովեն արդարադատության հաղթանակը»։
Ա. Ի.
