Նախագահ Ռոբերտ Քոչարյանի ղեկավարությամբ տեղի ունեցած կառավարության վերջին նիստում էներգետիկայի նախարարի եւ սակագների հարցի վերաբերյալ որոշակի խոսակցություն ունենալուց հետո արտադրական ենթակառուցվածքների նախարար Գագիկ Մարտիրոսյանը Ռոբերտ Քոչարյանին ասել է. «Պրն նախագահ, բա որ ասում ենք, որ կառավարությունը պիտի խորհրդարան ձեւավորի, իզո՞ւր ենք ասում»։
ՎԵՀԱՓԱՌԸ ԿՎԵՐԱԴԱՌՆԱ ԶԱՏԻԿԻ ՆԱԽՕՐՅԱԿԻՆ
Հայաստանյան Առաքելական եկեղեցու ընդհանուր փոխանորդ Գարեգին արքեպիսկոպոս Ներսիսյանից տեղեկացանք, որ Գարեգին Ա կաթողիկոսը կմասնակցի մարտի 24-26-ը Վատիկանում կազմակերպվելիք ցուցահանդեսին, որը նվիրված է Հայաստանում քրիստոնեության հաստատման 1700-ամյակին։ Վեհափառ հայրապետը, ինչպես ասաց Գարեգին արքեպիսկոպոսը, Աստծո կամքով Մայր աթոռ կվերադառնա մեծ Զատիկի նախօրյակին։
Կարդացեք նաև
Գարեգին Սրբազանի հետ հարցազրույցը կարդացեք 5-րդ էջում։
ՀՅԴ ԲՅՈՒՐԵՂՅԱ ԵՐԱԶԱՆՔԸ ԴԵՌ ԱՆԿԱՏԱՐ
«Առավոտը» փորձեց պարզել, թե արդյոք դաշնակցական տարբեր գործիչների խոստումների համաձայն, իրենք արդեն դիմե՞լ են իրավապահ մարմիններին՝ Լեւոն Տեր-Պետրոսյանին իր մարտի 5-ի որոշ հայտարարությունների համար պատասխանատվության ենթարկելու առնչությամբ։ «Հայցը մշակման փուլում է եւ կհրապարակվի, երբ պատրաստ լինի,- պարզաբանեց ՀՅԴ Հայաստանի ԳՄ անդամ Գեղամ Մանուկյանը։- Փորձում ենք մասնագիտական լուրջ եւ ծանրակշիռ փաստաթուղթ ներկայացնել, որ մերկապարանոց չլինի, ինչպես Լեւոն Տեր-Պետրոսյանի պնդումներն էին»։ Ըստ ամենայնի, հայցը կներկայացվի մարտի վերջին կամ ապրիլի սկզբին։
