Գեներալ Արծրուն Մարգարյանի սպանության գործով ձերբակալված Արմեն եւ Արսեն խաչատրյանների նախաքննությունն ապրիլի 11-ին պիտի ավարտվեր։ Նույնիսկ հոռետեսներն էին համոզված, որ մինչեւ ամսի 11-ը գոնե Արմեն Խաչատրյանն ազատ կարձակվի։ Տղաներն անցել էին բոլոր տեսակի փորձաքննությունները (ընդ որում՝ հաջող) եւ, ինչպես Արմենի փաստաբան Ամալյա Ավագյանն ասաց, մնացել էր միայն նրանց առերեսումը։
Սակայն երեկ Սպանդարյանի ժողդատարանում (դատավոր՝ Ավետիսյան) հարգվեց դատախազության միջնորդությունը՝ 2 ամսով երկարացնել Արսեն եւ Արմեն Խաչատրյանների խափանման միջոցը։ Այսինքն՝ եւս 2 ամիս նրանց պահել մեկուսարաններում։ Նրանց փաստաբանների դիմումը դատավորին՝ մերժելու դատախազության միջնորդությունը, չընդունվեց։ Խափանման միջոցը 2 ամսով երկարաձգելը պատճառաբանված է մոտավորապես այսպես. «Նման պայմաններում չկան բավարար երաշխիքներ, որ նրանք՝ Արմենն ու Արսենը, մնալով ազատության մեջ, չեն հաղորդակցվի միմյանց հետ ու չեն խոչընդոտի քննությանը»։ Մյուս փաստարկն էլ այն էր, որ դեռեւս որոշ փորձաքննությունների արդյունքներ անպատասխան են։ Այս ամենի տրամաբանությունն այնքան էլ հասկանալի չէ։ Նույն հաջողությամբ նույն արդյունքին կարելի էր հասնել նաեւ ազատ արձակելով միայն Արմեն Խաչատրյանին. նրա անմեղությունը լրիվ ապացուցված է։
Այս որոշումը փաստաբանները կբողոքարկեն Վճռաբեկ դատարանում, սակայն ամենայն հավանականությամբ, Արմենի եւ Արսենի խափանման միջոցները կմնան անփոփոխ։ Հօգուտ մեղադրյալների՝ շատ փաստեր կան, որոնք չեն հրապարակվում։ Փոխարենը հասարակությունը եւս 2 ամիս ստիպված է «սնվել» սեփական ենթադրություններով, որոնք ամենեւին հօգուտ ազատ ու անկախ դատարանների չեն լինի։
Լ. ԱՎԱԳՅԱՆ
