Հայաստանի Հանրապետությունը միշտ էլ հարգել է ազգային փոքրամասնությունների իրավունքները։ Այդ ավանդույթին էլ հավատարիմ մնալով, պարզվում է, ԱԺ առաջիկա խորհրդարանական ընտրություններում միայն եզդի ազգից գրանցվել են պատգամավորության երկու թեկնածու։
Թվում է արտառոց ոչինչ չկա, սակայն նրանցից Ջամալ Սադախյանը ներկայացվել է «Օրինաց երկիր» կուսակցությունից, իսկ Օմար Մամոյանը «Ազգային պետություն» կուսակցության կողմից։ Սա էլ երեւի թե նորմալ դիտվեր, եթե «Ազգային պետություն» կուսակցության գրասենյակում ինձ հանդիպած եւ աշխարհի եզդիների ազգային միության նախագահության անդամ, «Եզդիխանա» կուսակցության Արմավիրի մարզի ներկայացուցիչ ներկայացած Այսեր Իսայանը չհայտներ, թե իբր Ջամալ Սադախյանը սպառնում է Օմար Մամոյանին, պահանջելով, որպեսզի վերջինս հանի իր թեկնածությունը։ Ըստ Իսայանի, այդ կերպ Ջամալ Սադախյանը փորձում է եզդիների ձայները ուղղել դեպի «Օրինաց երկիր»։
«Այսօրվա դրությամբ, թե ինչի վրա է Ջամալ Սադախյանը հիմք դրել, կոնկրետ ես ներկայացնեմ, որ եզդի ազգը մեծամասամբ ցանկություն չունի իրեն ընդհանրապես ընդունելու։ Նա խուսափում է շատ տեղերի համայնքների հետ հանդիպելուց, իրեն փոխարեն ուղարկելով Հասան Թամոյանին։ Ինչի՞ համար ինքը դուրս չի գալիս, որովհետեւ հաստատ համոզված է, որ ժողովուրդը իրեն չի ընտրի, որ ցանկացած տեղ մտնելուց իր ձեւական հարգանք-պատիվը ինքը կգցի, կդարձնի հողին հավասար»,- հայաստանաբնակ եզդիների անունից նշեց Այսեր Իսայանը։
Լ. Մ.
