Որքան մոտենում է ընտրությունների օրը, այնքան քարոզչությանը հեռուստատեսության հատկացված ժամանակահատվածն առավել է ձգվում։ Երեկ, օրինակ, սովորական 1,5-2 ժամի փոխարեն շուրջ 3 ժամ տեւեց հոլովակների եւ ելույթների ցուցադրումը։
… ՀԴԿ նախագահ Արամ Սարգսյանն ավետեց. «Այսօր առավել լավ տրամադրություն ունեմ»։ Հաստա՛տ տրամադրությունը կփչանար, եթե իրենց կուսակցության ամենամեծ արժանիքների մասին հարցնեին ոչ թե ՀԴԿ անդամներին, այլ սովորական քաղաքացիներին։
… Ինչպես միշտ, վատ էր, «Իրավունք եւ միաբանություն» դաշինքի գործիչների տրամադրությունը եւ գուցե այդ պատճառով ուրիշներինն էլ փորձեցին փչացնել։ Մեկ Հրանտ Խաչատրյանն էր բոլոր նախկիններին հանցավոր անվանում՝ նախագահից մինչեւ գյուղապետ, մեկ Հայկ Բաբուխյանյանն էր գոռգոռում՝ «մենք իրավունք ունենք վրեժխնդիր լինելու»։ Ամեն ինչ էլ ունես՝ մենակ այդպես մի գոռա հոգնած մարդկանց վրա։
… Բավական նյարդային էր Պարույր Հայրիկյանի ելույթը, որ համառոտ կարելի էր այսպես փոխանցել, եթե Ռոբերտ Քոչարյանի հետ համագործակցության պատճառով ԱԻՄ-ը պիտի քիչ ձայն ստանա, ապա «Միասնությունն» ու ՀՅԴ-ն ոչ մի ձայն չպիտի ստանան։ Կամ ինչո՞ւ իրեն չի ներվում, որ նախագահի խորհրդականն էր, իսկ Վահան Հովհաննիսյանին ու Դավիթ Վարդանյանին ներվում է. «Ուրեմն, ինչ որ մենք ենք անում՝ վատ է, իսկ ուրիշները՝ լա՞վ»,- Պարույր Հայրիկյանն այս ամենը սադրանք էր համարում եւ վստահ էր, որ իրենք հիասթափվելու առիթ չեն տվել։
Կարդացեք նաև
… «Առաքելության» ներկայացուցիչը վիրավորված էր, որ իրենց գավառական կազմակերպություն են անվանել։
«Հզոր հայրենիքի» ներկայացուցիչն էլ այլոց էր վիրավորում, թե «նախկին կազմակերպությունները ժողովրդին հասցրին այսօրվան»… Բայց այս ամենը լսելու համար ընդամենը 3 օր է մնացել, որ արդեն լավ է։
