Բաքվում «Ազատություն» կուսակցության նախաձեռնությամբ տեղի է ունեցել մեծ ցույց։ Ցուցարարները շարժվել են ԱՄՆ դեսպանատան ուղղությամբ՝ «Մի աջակցեք հայ զավթիչներին», «Հրաժարվեք 907 բանաձեւից», «Ճնշում մի գործադրեք Ադրբեջանի վրա» կարգախոսներով։ Ցուցարարները թղթակիցներին ասել են, որ ԱՄՆ-ը խոստանում է, բայց իրական քայլեր չի ձեռնարկում Ադրբեջանին օգնելու համար։ Նույն թղթակիցները հաղորդում են, որ ոստիկանները ցուցարարներից խլել են պաստառները։
ՎԱՏ ԼՈՒՐ
Թերեւս իզուր էր նախագահի աշխատակազմի ղեկավար Ալեքսան Հարությունյանը հույս հայտնում, որ սխալ թարգմանության արդյունք է Միշել Լեգրայի այն արտահայտությունը, թե Հայաստանը պատերազմի է պատրաստվում՝ հաշվի առնելով վերջերս ստացած «ՄԻԳ»-երը եւ ժամանակակից զենքերը։ Նույն հարցազրույցից ծավալի պատճառով դուրս մնացած մի հատվածը դեսպանի համոզվածության վկայությունն է։ Թղթակիցն ասել էր. «Ճշտենք, «ՄԻԳ»-երը, որ բերվել են Հայաստան, միայն հակաօդային պաշտպանության համար են, իսկ Ադրբեջանի սպառազինությունները մի քանի անգամ Հայաստանի սպառազինություններին գերազանցում են»։ Եվ Միշել Լեգրան պատասխանել էր. «Դուք նույն դիրքերի վրա եք դնում իրականությունը՝ ստացված «ՄԻԳ»-երը եւ ապագան, որն անորոշ է։ Այսպիսի համեմատությամբ շատ առաջ չեք գնա»։
