Օգոստոսի 8-ին՝ նշանակված օրը, Գորիսում տեղի ունեցան քաղաքապետի ընտրություններ։ Գորիսում նոր քաղաքագլուխ ընտրվեց Համլետ Մկրտչյանը։
Հիշեցնենք, որ պրն Մկրտչյանի վստահված անձինք մեկ շաբաթ առաջ «Արմենպրեսի» մամուլի սրահում ասուլիս էին հրավիրել, ուր բազմիցս նշվել էր, որ Համլետ Մկրտչյանին մինչեւ ընտրությունները կնեղեն նախկին քաղաքապետ Սուրեն Խաչատրյանի կողմնակիցները, որպեսզի նա հանկարծ քաղաքագլուխ չդառնա։ Վստահված անձինք նույնիսկ նշել էին, որ «Միասնություն» դաշինքն իր ողջ ուժը կօգտագործի քաղաքապետի պաշտոնակատար Արա Դոլունցին քաղաքապետ դարձնելու համար։
Բայց Համլետ Մկրտչյանի հույսերն ու սպասելիքները չարդարացան։ Նրան չնեղեցին, չխեղդեցին, գլխին պարկ հագցրած՝ Վարարակի ալիքներին չհանձնեցին, ինչպես ժամանակին դա արվեց Ռուսաստանի նախագահ Բորիս Ելցինի հետ, եւ այլն եւ այլն։ Փոխարենը՝ նրան հնարավորություն տրվեց դառնալ քաղաքապետ։ Առայժմ հայտնի չէ, թե ընտրությունների ժամանակ Մկրտչյանի կողմնակիցները ուժային ինչ մեթոդներով են կորզել առավելագույն՝ 3924 ձայնը, քանզի պրն Մկրտչյանի վստահված անձինք հավաստիացնում էին, որ Գորիսում ընտրություններն անցնելու են ուժային սցենարով։
Ինչ վերաբերում է Արա Դոլունցին, ապա նա ընտրություններում գրավեց պատվավոր 3-րդ տեղը (1966 ձայն), երկրորդ տեղն էլ՝ 2020 ձայնով, զիջելով Մասիս Բաղրյանին։
Կարդացեք նաև
Իսկ նոր քաղաքապետն ասում են այնքան «փակ է աշխատել», որ ոչ ոք չգիտի, թե ովքեր են եղել նրա հովանավորները։ Գորիսեցիներին նա հայտնի է որպես 1991-92 թթ. Գորիսի քաղաքագլուխ, ինչպես նաեւ՝ գարեջրի գործարանի տնօրեն։
Գ. Ա.
