Եռամսյա անորոշությունից հետո ԼՂՀ ԱԺ նախագահությունը կառավարության միջնորդությամբ ԼՂՀ հանրապետական «Ազատ Արցախ» պաշտոնաթերթի գլխավոր խմբագիր է նշանակել Միքայել Հաջյանին։ Ավելի վաղ թերթի հիմնադիրներին նման խնդրանքով դիմել էր նաեւ թերթի աշխատակազմը։ Միքայել Հաջյանը 1995-96 թթ. գլխավորել է լրատվության եւ մամուլի դեպարտամենտը, հետո հիմնադրել է «Ձայն արդարության» ադրբեջաներեն հեռարձակվող անկախ ռադիոկայանը։ Ի դեպ, պրն Հաջյանը ժամանակին թղթակցել է «Առավոտին»։ Շնորհավորում ենք։
ՎԱՏ ԼՈՒՐ
Տեղեկատվության եւ գրահրատարակչության վարչությունը խիստ յուրօրինակ մեթոդներ է որդեգրել լրատվամիջոցների համար կառավարության նախատեսած գումարների բաշխման նպատակով։ Ըստ որոշ տեղեկությունների, այս անգամ ցանկում հայտնվել են այնպիսի պարբերականներ, ինչպիսիք են «Հայաստանի աշխատավորուհին» (տեսնես, վերջին համարը քանի՞ տարի առաջ է լույս տեսել) եւ «Եթերը», որն իր էջերը հեղեղած գովազդների եւ թերթի այլ եկամուտների հաշվին վերջերս BMW էր գնել։ Հաստատ, նաեւ կառավարության օգնության կարոտ է։
