Երեկ ժամը 15-ի կողմերը լուր տարածվեց, որ հիվանդանոցում մահացել է Անդրանիկ Մանուկյանը։ Բարեբախտաբար՝ լուրը հերքվեց։ Կապվեցինք «Էրեբունի» բժշկական կենտրոնի գլխավոր տնօրեն Հարություն Քուշկյանի հետ։ Վերջինս ասաց, որ Մանուկյանը գտնվում է վերակենդանացման բաժնում. «Վիճակը ծանր է, շատ ծանր, բայց արվում է հնարավոր ամեն ինչ՝ կյանքը փրկելու համար։ Շանսեր կան»։ Ժամը 22-ին վերստին կապվեցինք պարոն Քուշկյանի հետ, որը նշեց. «Վիճակը առայժմ նույնն է։ Մեզ հույս է տալիս այն փաստը, որ չնայած դիմածնոտային ահավոր վնասվածքներին եւ արյունազեղմանը, Անդրանիկ Մանուկյանի ուղեղը վնասված չէ։ Հուսանք եւ սպասենք»։
ՎԱՏ ԼՈՒՐ
ՆԳ նախարար Սուրեն Աբրահամյանը, ինչպես «Առավոտը» ճշտեց նախարարության լրատվական վարչության պետի պաշտոնակատար Արտակ Վարդազարյանից, իր պարտքն է համարել ՀՀ նախագահին ներկայացնել հրաժարական։ Հրաժարականը պայմանավորված չէ որեւէ մեկի ճնշմամբ կամ հայտարարությամբ։ Պարզապես, կատարվածից հետո՝ անկախ մեղքի իր բաժնից, նա իր բարոյական պարտքն է կատարել։ Հանրապետության նախագահի մամուլի ծառայությունից տեղեկացանք, որ նախագահը որեւէ հրաժարական չի ստորագրել։ Ըստ չճշտված լուրերի, հրաժարական է տվել նաեւ ԱԱ նախարար Սերժ Սարգսյանը:
