«Առավոտի» երեկվա համարում մի փոքրիկ հատված էինք ներկայացրել Ղարաբաղյան շարժման հիմնադիրներից մեկի՝ նախկին «Կռունկ» կոմիտեի ղեկավար Արկադի Մանուչարովի՝ «Ազատություն» ռ/կ-ի Մոսկվայի թղթակցին տված հարցազրույցից։ Մեջբերենք այս զրույցի այլ հետաքրքրական դատողություններ եւս։
Հոկտեմբերի 27-ի արյունահեղությունը եւ Արկադի Ղուկասյանի դեմ մահափորձը պրն Մանուչարովը եւս դիտարկել էր որպես մեկ շղթայի օղակներ. «Ամեն անգամ, երբ վերնախավում հղանում են ղարաբաղյան հակամարտության կարգավորման այնպիսի մտադրություններ, որոնք չեն համապատասխանում հայ ժողովրդի ոգուն՝ շարքից հանվում են նրանք, ովքեր կարող են խանգարել դավաճանություն հանդիսացող փաստաթղթերի ստորագրմանը»։
Արկադի Մանուչարովը նաեւ ասել է, որ դեռ շատ վաղ է միանշանակ պնդել, որ Ղարաբաղում կատարվածը «Նեղացած գեներալ Սամվել Բաբայանի արածն է։ Նման պարագաներում միշտ գտնվում են մարդիկ, ովքեր հանցագործություն են կատարում՝ գիտենալով, որ մեղքը կգցվի վիրավորվածների վրա։ Այո՛, Սամվել Բաբայանի դիրքերն այսօր շատ թույլ են եւ նրան կարելի է ամեն բանում մեղադրել։ Սակայն այս հարցին հարկավոր է շատ լուրջ մոտենալ, քանի որ հիմա Ղարաբաղի ճակատագիրն է վճռվում»։
Ա. Ի.
