«ԼՂՀ դատախազությունը առնչություն չունի լրագրող Վահրամ Աղաջանյանի ձերբակալության եւ նրա բնակարանում անցկացրած խուզարկության հետ։ Հիշյալ գործողություններն իրականացրել է ԼՂՀ ներքին գործերի նախարարությունը՝ դատախազությունից սանկցիա չստանալով»։
Այս մասին Վահրամ Աղաջանյանին ու նրա ընտանիքին տեղեկացրել է ԼՂՀ գլխավոր դատախազ Մավրիկ Ղուկասյանը։ Խուզարկության եւ ձերբակալության վերաբերյալ սանկցիաների պատճենները, ըստ օրենքի, պետք է պահպանվեն ՆԳՆ-ում։ Վերջերս լրագրողը դիմել է ՆԳ նախարարին՝ պահանջելով ցույց տալ սանկցիաների պատճենները, սակայն՝ ապարդյուն. այդպիսի սանկցիաներ գոյություն չունեն։ ԼՂՀ դատախազությունը, իրոք, չի լիազորել ոստիկանությանը լրագրողի բնակարանը խուզարկելու եւ նրան ձերբակալելու թույլտվությամբ։ Օրենքը խախտել է անձամբ ԼՂՀ ՆԳ նախարար, գնդապետ Բակո Սահակյանը՝ ապօրինի հրաման արձակելով եւ անմեղ մարդուն ձերբակալելով։
Հիշեցնենք, որ նաեւ ԼՂՀ ոստիկանության բարբարոսական գործողությունների հետեւանքով սրտային սուր անբավարարությունից հանկարծամահ է եղել լրագրողի մայրը՝ Ռոզա Ավետիսյանը։ Հաշվի առնելով այս փաստը, Վահրամ Աղաջանյանը հունվարի 15-ին դիմել է ԼՂՀ գլխավոր դատախազին՝ պահանջելով անհապաղ քրեական գործ հարուցել ՆԳ նախարար Բակո Սահակյանի դեմ։ Միաժամանակ, լրագրողի ընտանիքը Մավրիկ Ղուկասյանից պահանջել է քրեական պատասխանատվության ենթարկել Ստեփանակերտի քաղդատարանի նախագահ Նաիրի Հակոբյանին՝ անօրինական դատավճիռ կայացնելու եւ մարդասպանությանը դիտավորյալ կերպով նպաստելու համար։ ՀՀ քաղաքացի Վահրամ Աղաջանյանն ու նրա ընտանիքը պատրաստվում են դիմել ՀՀ նախագահ Ռոբերտ Քոչարյանին։
Ի դեպ, «Միջազգային համաներում» աշխարհահռչակ իրավապաշտպան կազմակերպությունը մանրամասն զեկույց է ներկայացրել լրագրողի վերաբերյալ եւ նրան պաշտոնապես ճանաչել է որպես խղճի բանտարկյալ։
Կարդացեք նաև
Սեփ. լր.
