Այսօր հատուկ ՀԱԿ-ի հանրահավաքի համար Ազատության հրապարակ էր եկել արեւածաղկի սերմ, դդումի կուտ, գետնանուշ վաճառող Անգինը: Նրա խոսքերով՝ «միտինգներին գործս լավ է լինում, էլի մի քանի բաժակ ծախում եմ»:
Նա ասաց, որ ՀԱԿ անդամ է, բայց դեռ չգիտի, թե ում է ընտրելու. «Տենանք էլի, չգիտեմ ում կընտրեմ՝ Սերժի՞ն, թե՞ իրան: Որին էլ ընտրենք՝ էս ա մեր գործը, էս կուլոկներն են իմ գործը, կարո՞ղ ա սրանից լավ լինի: Ի՞նչ պիտի լինի: Ոչ էն ա մի բան, ոչ էն: Աշխարհին թող խաղաղություն լինի՝ ով ուզում է ընտրվի: 56 տարեկան կնիկ եմ՝ աշխատանք չունեմ: Լեւոնի ժամանակ հավաքարարություն եմ արել, էս երկրի համար զինվոր եմ տվել: Տղես գնաց բանակ եկավ՝ մահացավ, որովհետեւ բանակում գլուխը ցավացել էր՝ առանց ստուգելու գլխացավի դեղ էին տվել, փորը ցավացել էր՝ փորացավի դեղ են տվել, բանակից եկավ՝ 6 ամիս չանցած՝ մահացավ, այ ըտենց են սալդատ պահում»: Մեր հարցին՝ չնայած ՀԱԿ անդամ եք, բայց ոնց որ Տեր-Պետրոսյանի հետ էլ առանձնապես հույս չեք կապում՝ նա պատասխանեց. «Ես մենակ Աստծո հետ եմ հույս կապում, Լեւոնի հետ խի՞ պիտի հույս կապեմ: Մենակ մեր երեխեքը ապագա ունենան, մեր կյանքը չունենան: Էս ապրե՞լ է, նիսյայով օրեկան ապրանք եմ վերցնում՝ որ ապրեմ: Սեմչկեն էլ նիսյա եմ վեկալում, որ հացս հայթայթեմ»:
Հռիփսիմե ՋԵԲԵՋՅԱՆ
Կարդացեք նաև
