Ռուսաստանի օրենսդիրները հավանության են արժանացրել չարտոնված ցույցերի մասնակիցների նկատմամբ կիրառվող տուգանքների կտրուկ բարձրացման մասին օրինագիծը:
Երկրի խորհրդարանի ստորին պալատի՝ Պետդումայի կողմից երրորդ և վերջնական ընթերցմամբ երեքշաբթի օրն ընդունված օրինագծի կողմ է քվեարկել խորհրդարանի 241, դեմ՝ 147 պատգամավոր:
Օրենքով նախատեսվում է բարձրացնել չարտոնված ցույցերի մասնակիցների նկատմամբ տուգանքների չափը 30-ի դոլարից մինչև մոտ 9 հազար դոլար, նախատեսվում է նաև կիրառել մինչև 200 ժամ հանրային աշխատանքներ: Օրենքում կատարվել են նաև այլ փոփոխություններ, որոնք միտված են չարտոնված հանրահավաքներին խոչընդոտելուն:
Ռուսաստանի ոստիկանությունը երեքշաբթի օրը ձերբակալել է խորհրդարանի շենքի մոտակայքում «Միացյալ Ռուսաստան» կուսակցության կողմից ներկայացված օրինագծի ընդունման դեմ բողոքի ցույց անցկացնող 20 ցուցարարի:
Կարդացեք նաև
Ռուսաստանի նախագահ Վլադիմիր Պուտինի գլխավորած կուսակցությունը նախկինում առաջարկել էր բարձրացնել տուգանքի չափը մինչև մոտ 31 հազար դոլար:
Արմեն Հովհաննիսյան
«Ամերիկայի Ձայն»
