Հուլիսի 24-ին Տավուշի մարզ էր այցելել բնապահպանության նախարար Արամ Հարությունյանը: Նա «Դիլիջան» ազգային պարկում, Տավուշի մարզպետարանում եւ անտառի ուսուցման «Զիկատար» կենտրոնում քննարկեց մարզի բնապահպանական խնդիրները: Կողբ գյուղից 10 կմ հեռավորությամբ գտնվող անտառի ուսուցման «Զիկատար» կենտրոնում Արամ Հարությունյանը մասնակցեց «Այցելուների կենտրոնի» հանդիսավոր բացմանը: Այն ստեղծվել է Բնության համաշխարհային հիմնադրամի ֆինանսավորմամբ: Կենտրոնը հագեցած է համակարգիչներով, ինտերնետ կապով, կենտրոնի աշխատակիցները զբոսաշրջիկներին տեղեկատվություն են տալիս զբոսաշրջային 4 երթուղիների վերաբերյալ: Երթուղիների վերաբերյալ ճանապարհային նշաններ եւ տեղեկատվական վահանակներ են տեղադրված, զբոսաշրջիկներն այդ երթուղիներով կայցելեն նաեւ պատմամշակութային հուշարձաններ: Երթուղիներից մեկը ձգվում է գեղատեսիլ կենու անտառի միջով: Կենտրոնը զբոսաշրջիկներին տրամադրում է հեծանիվներ, ձկնորսական պարագաներ, վրաններ, հեռադիտակներ, գնդակներ, «Զիկատար»կենտրոնում առկա են զբոսաշրջիկների գիշերակացի համար լավ պայմաններ: Ստացված հասույթը սահմանամերձ Կողբ համայնքի համար այլընտրանքային եկամտի աղբյուր է : Այդ ծրագրով Կողբ համայնքում ստեղծվել է նաեւ էկոլոգիապես մաքուր պտուղ-հատապտղի ընդունման կետ:
Բնապահպանության նախարարը բարձր գնահատեց «Զիկատար» ուսումնական կենտրոնի գործունեությունը: 2012թ. ապրիլ- հունիս ամիսներին այստեղ կազմակերպվեցին բնության հատուկ պահպանվող տարածքների վերաբերյալ ուսուցումներ, որոնց մասնակցեցին 8 լրատվամիջոցների, բնապահպանական թվով 7 ՀԿ-ի ներկայացուցիչներ , նաեւ Տավուշի մարզի Կողբ եւ Ջուջեւան համայնքների բնակիչներ, որտեղ իրականացվում է համայնքային անտառկառավարման ծրագիր: Արամ Հարությունյանը կարեւորելով լրագրողների համար մասնագիտական ուսուցումը, նշեց.
-Ցավոք սրտի, մենք շատ դեպքերում ականատես ենք լինում այնպիսի նյութերի, վերլուծությունների, որոնք իրականության հետ քիչ կապ ունեն :
Բնապահպանության նախարարը հանրապետական մի շարք լրատվամիջոցների թղթակիցների, այդ թվում` Տավուշի մարզում «Առավոտի» թղթակցին հանձնեց բնության հատուկ պահպանվող տարածքների վերաբերյալ սեմինարին մասնակցելու հավաստագիր:
Կարդացեք նաև
Ոսկան ՍԱՐԳՍՅԱՆ
