Վարչական շրջաններում մայթերը բռնազավթած կրպակներին դեռ «կպնող» չկա
Երեւանում մայթերի ու գազոնների վրա տեղադրված տարատեսակ ժամանակավոր կրպակների ապամոնտաժման գործընթացը, որն ակտիվ էր հատկապես քաղաքի կենտրոնում, կարծես թե շարունակություն չի ունենում: Վարչական շրջաններում մթնոլորտը շատ խաղաղ է: Մասնավորապես՝ Էրեբունիում այդ առումով ոչինչ չի կատարվում: Ավելին, այս համայնքի պարագայում տպավորությունն այնպիսին է, թե կրպակապատումը շարունակվում է: Առանձին դեպքերում հին կրպակների փոխարեն՝ ավելի բարետես եւ մեծ կրպակներ են տեղադրվում: Իսկ ընդհանրապես՝ զանգվածաբար կրպակապատված տարածքներից ոչ մի կրպակ չի հանվել: Էրեբունիում մայթերին կրպակներ տեղադրելու պիկը տեղի է ունեցել վերջին 6-7 տարիներին: Դրանք ոչ միայն հենց մայթին են դրված, այլեւ ակնահաճո չեն, անկանոն են տեղադրված, ինչն էլ ավելի է փչացնում մայրաքաղաքի տեսքը: Այս համայնքում փողոցների տեսքը աղավաղող, ուս ուսի տված կրպակներ էլ շատ կան: Շատ թաղամասերում մայթերն այնքան են նեղացել, որ անցորդները ստիպված են լինում քայլել տրանսպորտի ճանապարհով՝ վտանգելով իրենց կյանքը: Կրպակներից շատերն էլ կառուցվել են բնակելի շենքերի կամ մեծ խանութների դիմաց եղած կանաչապատման համար նախատեսված գոտիներում: Էրեբունիի վարչական շրջանի պատասխանատուները մտադիր չեն նույնիսկ այդ տեղերում տեղադրված կրպակները ապամոնտաժել:
Էրեբունիի տարբեր փողոցներում կրպակները բռնագրավել են մայթերը:
Կարդացեք նաև
ՏԱԹԵՎ ԿԱՐԱԿԱՇՅԱՆ
Լուսանկարները՝ հեղինակի
«Առավոտ» օրաթերթ
