Ինչպես տեղեկացրել ենք, հոկտեմբերի 23-25-ը ՀՀ կրթության և գիտության նախարար Արմեն Աշոտյանի կողմից ստեղծված հանձնաժողովը ուսումնասիրություններ էր կատարել Գյումրու Միքայել Նալբանդյանի անվան պետական մանկավարժական ինստիտուտում, մի շարք խախտումներ բացահայտել , որի պատճառով էլ պարոն Աշոտյանը խիստ նկատողություն էր տվել բուհի ռեկտորին:
Քանի որ այս ամենը կատարվել էր նախագահական ընտրություններին ընդառաջ, կարծիք էր ձևավորվել, որ ՀՀԿ-ական նախարարը այս միջոցով պատժում է ԲՀԿ-ական ռեկտորին, «մեսիջ» ուղարկում նախագահական ընտրություններում իր թեկնածությունն առաջադրելու մտադրություն ունեցող Գագիկ Ծառուկյանին: Սակայն Արմեն Աշոտյանը իր ֆեսբուքյան էջում կտրականապես հերքել էր հարցի քաղաքական երանգ ունենալը ու լրագրողներին առաջարկել ուսումնասիրել նախարարության ստուգումների արդյունքները: Այսօր Գյումրու պետական մանկավարժական ինստիտուտի ֆեսբուքյան էջում նույն առաջարկն էր հնչեցրել նաև ռեկտոր Վարդևան Գրիգորյանը` խորհուրդ տալով հարցը չքաղաքականացնել:
Aravot.am-ը ուսումնասիրեց նախարարության` Գյումրու մանկավարժական ինստիտուտում կատարված վերահսկողության արդյունքում կազմված ակտը: Այստեղ, որպես բուհի կողմից թույլ տված խախտում, նշված է այն, որ բարձրագույն մասնագիտական կրթական ծրագրով , բակալավրի որակավորման աստիճանով, առկա ուսուցմամբ`«Թարգմանչական գործ» մասնագիտության գծով 2010-2013 ուս.տարիներին` ընդունելության սահմանային թույլատրված 15 տեղի վրա ընդունվել է 30 ուսանող: Նման մի խախտում է արձանագրվել մագիստրոսի որակավորման աստիճանով «Ինֆորմատիկա» մասնագիտության տեղերի համար. նախատեսված 10 ուսանողի փոխարեն ընդունել են 12-ը:
Կարդացեք նաև
Այնուհետ նախարարության 5 հոգանոց հանձնաժողովը պարզել է, որ որոշ դասախոսների աշխատանքային գրքույկները բացակայում են անձնական գործերից: Հանձնաժողովականները պատահականորեն ընտրել ու ուսումնասիրել են 57 հիմնական աշխատող դասախոսների անձնական գործեր, որոնցից 15 –ի փաստաթղթերում նկատվել են թերություններ:Իսկ Անի Սուրենի Սահակյանը, ըստ նախարարության ակտի, ունի չհավատարմագրված դիպլոմ:
Նախարարության աշխատակիցները ֆիքսել են նաև, որ աշխատանքային գրքույկներում կատարված գրառումներում պահպանված չեն օրենսդրական տեխնիկայի կանոնները , դրանք ձևակերպված են անփույթ, և վերնագրերը չեն համապատասխանում բովանդակությանը:
Ստուգողները դժգոհ են եղել նաև նրանից, որ դասախոսները , «Բարձրագույն և հետբուհական մասնագիտական կրթության մասին» ՀՀ օրենքը չպահպանելով, ոչ պակաս, քան 5 տարին մեկ չեն վերապատրաստվել: 2004-2010թվականերին վերապատրաստվել են ընդամենը 11 դասախոս: Հանձնաժողովը դժգոհ է մնացել նաև ուսանողների անձնական գործերում տեղ գտած թերացումներից, ըստ նրանց, «գործավարությունը կազմակերպված է կոպիտ թերացումներով, ինչի պատճառով այդ մասով որևէ տեղեկատվություն ստանալը դառնում է ժամանակատար գործընթաց»:
Նշվում է նաև, որ հեռակա ուսուցմամբ սովորող ուսանողների գերակշիռ մասի հետ ինստիտուտը պայմանագրեր ընդհանրապես չի կնքել:
Նկատենք սակայն, որ նախարարական հանձնաժողովի ոչ բոլոր արձանագրությունների հետ են համամիտ բուհում, այստեղից գրավոր առարկություններ են ներկայացրել նախարարին: Մասնավորապես չեն համաձայնել այն դիտողությանը, թե «Թարգմանչական գործ» մասնագիտության գծով 2010-2011 և 20120-2013 ուստարիներին թուլատրված 15 տեղի վրա ընդունվել են 30 ուսանող: Բուհից պարզաբանել են, որ «2010-2011 ուստարում 032300 «Թարգմանչական գործ` անգլերեն և հայերեն» մասնագիտության գծով բուհի կողմից իրացվել է 9 տեղ` 15 տեղի փոխարեն, և 032300 «Թարգմանչական գործ` ռուսերեն և անգլերեն» մասնագիտության գծով 12 տեղ` 15 փոխարեն, իսկ 2011-2012 ուստարում` հատկացված տեղերը չեն իրացվել»:
Բուհի ղեկավարությունը չի համաձայնել նաև նախարարության այն արձանագրության հետ, որ պատահական ընտրված 57 հիմնական աշխատող դասախոսների անձնական գործերից 15-ի աշխատանքային գրքույկները բացակայում են , իսկ Անի Սուրենի Սահակյանը ունի չհավատարմագրված դիպլոմ: « Ձեր այդ դիտողությանը պատասխանում ենք, որ բուհի կադրերի բաժնում ուսումնասիրվել է մոտ 100 աշխատակցի անձնական գործ, որոնցից նշված 15 աշխատանքային գրքույկների բացակայությունը անձնական գործերում ունի հիմնավորում.Վարդանյան Արուսյակ Ռաֆիկի փոխել է աշխատանքի հիմնական վայրը, 3 աշխատակիցներ` Սուքիասյան Գագիկ Արամի, Առաքելյան Աննա Ազատի, Մութաֆյան Մանյա Նորիկի ազատվել են աշխատանքից, իսկ 3 աշխատակցի` Խաչատրյան Սոնիկ, Ալիխանյան Նելլի և Մանուկյան Հաբեթի աշխատանքային գրքույկները կենսաթոշակային հարցերով պայմանավորված ներկայացվել են սոցիալական ապահովության Գյումրու տարածքային կենտրոն, իսկ բուհի Զինվորական ամբիոնի 8 հիմնական աշխատակիցների աշխատանքային գրքույկները , ըստ կարգի, ՀՀ Պաշտպանության նախարարությունում են» :
Բուհի ղեկավարությունը նաև առարկում է արձանագրված այն կետին, թե Անի Սուրենի Սահակյանը չհավատարմագրված դիպլոմ ունի: «Անի Սուրենի Սահակյանը սովորել և ավարտել է «Հայաստանում ֆրանսիական համալսարան» հիմնադրամի բակալավրիատը և մագիստրատուրան` ստանալով պետական նմուշի դիպլոմ: Վերոնշյալ համալսարանը ՀՀ-ում գործող պետական մասնակցությամբ բուհերի ցանկում է »:
Մանկավարժականի ղեկավարությունը չի համաձայնում նաև նախարարության այն դիտողության հետ, թե բուհի դասախոսները օրենքով սահմանված կարգով ոչ պակաս, քան 5 տարին մեկ չեն անցել վերապատրաստում: «Այս դիտողությանը պատասխանում ենք, որ բուհում 2004-2012 թթ.պրոֆեսորադասախոսական կազմի թվով 84 աշխատակցի շնորհվել է գիտական կոչում և աստիճան, որը համարվում է որակավորման բարձրացում:Վերապատրաստման դասընթացների ` հիմնականում մայրաքաղաքում կազմակերպված լինելու պատճառով մեր բուհը կորում է ֆինանսական որոշակի դժվարություններ, ինչպես նաև առաջանում են ուսումնական գործընթացի կազմակերպման խնդիրներ», – նշված է առարկության մեջ:
Ներկայացնելով իր առարկությունները`ռեկտոր Վարդեվան Գրիգորյանը գրում է , որ համաձայն է ակտում տեղ գտած մյուս դիտողությունների հետ:
Նունե ԱՐԵՎՇԱՏՅԱՆ
