Լեւոն Շիրինյան. «Մենք պետք է ռուսներին ասենք` բարեկա’մ, արածներդ չենք մոռացել, բայց դա չի նշանակում, որ մենք դրանով առաջնորդվում ենք, այնպես որ` հակառուսական ոչինչ չեմ տեսնում: Մենք պատրաստ ենք դաշնային հարաբերությունների, բայց արժանապատիվ ձեւով»:
Արդյոք նախագահի թեկնածուների հավաքած ձայները նրանց պատկանող իրակա՞ն ձայներն են` հարցին, այսօր «Ելակետ» ակումբում քաղաքագետ Լեւոն Շիրինյանը պատասխանեց. «Ով ստացել է` իրենց ձայներն են, բա ո՞ւմ ձայներն են: Այսպիսի հարցադրում չկա քաղաքագիտության մեջ»:
Ասուլիսի թեման հետընտրական զարգացումներն ու ներքաղաքական իրադարձություններն էին:
Քաղաքագետը, անդրադառնալով անցյալ տարվա մայիսին Ազգային ժողովի ընտրություններին, ասաց, որ այսօր ԱԺ-ի արձակումը ամենալավ լուծումը կարող է լինել. «Մեր Ազգային ժողովն այսօր չի արտացոլում սոցիալ-դասակարգային, մասնագիտական խմբերի շահերը: Սա խորհրդարանը ու երկիրը դարձնում է ոչ հավասարակշռված: Այսպիսի հասարակությունները միշտ պայթյունավտանգ են, կա’մ կարող են գնալ ցնցումների կա’մ արտագաղթի»:
Կարդացեք նաև
Քաղաքագետը, անդրադառնալով այս օրերին տեղի ունեցող քաղաքական իրադարձություններին, կարծիք հայտնեց, որ լուծումը կարող է լինել երկխոսությունը, բանակցությունները. «Քցելը, խաբելը հայերի պրակտիկան չէ, եթե մեր պատմությունը նայենք»:
Այն հարցին էլ, թե կա՞ն այսօր հակառուսական տրամադրություններ, պարոն Շիրինյանն ասաց, որ հակառուսական ոչինչ չի տեսնում: Ըստ նրա՝ այսօր Հայաստանը պետք է ձգտի գործընկեր լինել , իսկ թշնամության համար միշտ ունենք պատճառներ. «Մենք պետք է ռուսներին ասենք՝ բարեկա’մ, արածներդ չենք մոռացել, բայց դա չի նշանակում, որ մենք դրանով առաջնորդվում ենք: Այնպես որ՝ հակառուսական ոչինչ չեմ տեսնում: Մենք պատրաստ ենք դաշնային հարաբերությունների, բայց արժանապատիվ ձեւով»:
Սուսաննա ՕՀԱՆՅԱՆ
