Նա առաջարկում է Սերժ Սարգսյանին «թարգել նախագահական այս աթոռակռիվը»:
Այսօր մարզային այցելությունների շրջանակներում Րաֆֆի Հովհաննիսյանը կրկին Վանաձորում էր:
Իր ելույթում «Ժառանգության» առաջնորդը կոչ արեց վանաձորցիներին եւ ամբողջ հայությանը միասնական լինել:
«Մեր ճանապարհը բաց է բոլորի համար անխտիր, ես կդիմեմ ցանկացած հայ մարդու, կզանգեմ ցանկացած հեռախոսի համարով, միայն թե ժողովուրդը միասնական լինի, բայց իմ հետեւից չբամբասեք, ժուչոկ չծառայեք: Ով անկեղծ է, պարոն Ծառուկյան, Հրանտ, Լեւոն, բոլորը միասին թող գան մեյդան, թող գան հրապարակ, կուսակցակռիվը, էժան խաղերը անցել են արդեն, ժողովուրդը որոշել է, մենք մեկ ազգ ենք, մեկ պետություն ենք, հասկացեք այսօրվա վիճակը: Եթե Ձեզ համար թագավոր է Սերժը, պարոն Ծառուկյան կամ պարոն Մարգարյան, կամ որեւէ այլ հարգելի հայրենակից, դա Ձեր գործն է, ինձ համար թագավոր է օրենքը, իրավունքը, ՀՀ-ն եւ մեր երեխաների ապագան»:
Կարդացեք նաև
Անդրադառնալով Սերժ Սարգսյանին վերջերս ուղղված իր արտահայտությանը` Րաֆֆի Հովհաննիսյանը պարզաբանեց, որ առաջարկել է Սերժ Սարգսյանին թարգել աթոռակռիվն ու ժողովրդին ազատ թողնել:
«Սա աթոռակռիվ չէ, եւ ես Նոյեմբերյանում, երեկ էլ Շամշադինում ասացի` թարգենք նախագահական այս աթոռակռիվը, սա մեր հայրենիքի համար է, եկեք դուք եւ ես, պարոն Սարգսյան, մեր մեջի կյանքի վերջին կաթիլը ծառայենք սահմանի վրա` որպես զինվորներ, դուք ինձ Ձեր արվեստը ցույց կտաք, ես էլ Ձեզ` աշակերտ, եւ մեր ժողովուրդը ազատ թողնենք, ազատ իր իրավունքի մեջ, իր երեխաներով`ունենալով ոչ թե կուսակցապետություն, այլ Հայաստանի Հանրապետություն: Այդ երդումը միասին սահմանի վրա կատարենք»,-ասաց Րաֆֆի Հովհաննիսյանը:
Անուշ ԲՈՒԼՂԱԴԱՐՅԱՆ
