Հայ հեղափոխական դաշնակցությունը հնարավոր է համարում Երեւանի ավագանու ընտրությունների արդյունքում ընդդիմության միավորումը եւ կոալիցիա կազմելով քաղաքապետարանի «գրավումը»:
ՀՅԴ խմբակցության ղեկավար Արմեն Ռուստամյանն այսօր ՀԱԿ հիմնադիր համագումարում լրագրողների հետ զրույցում ասաց, որ այս ընտրությունները շատ լավ առիթ են ցույց տալու, որ ընդդիմությունը պատրաստ է կարեւոր խնդիրների շուրջ միավորվել, դա հնարավորություն կտա ընդդիմությանը իշխանություն հաստատել Երեւան քաղաքում. «Այս պահը չի կարելի կորցնել: Եթե նախընտրական դաշինքը չստացվեց, կարելի է մտածել եւ իրականացնել հետընտրական դաշինքը, որը կարող է նույն խնդիրը լուծել ավագանու ներսում»:
Անդրադառնալով ժողովրդական շարժմանը, պարոն Ռուստամյանն ասաց. «Շարժումը որպես այդպիսին չկարողացավ կազմավորվել, ձեւավորվել: Այդ անկազմակերպության արդյունքները մենք տեսանք ամսի 9-ին, ամբողջ խնդիրն այն էր, որ պետք էր իսկապես խուսափել երկու ճանապարհից: Մեկը հուսալքության տանող ճանապարհն է, երբ ամեն ինչ եւ հիմա տրամաբանության վրա ես կառուցում, բայց կարող է դրան չհասնես եւ հուսալքություն առաջանա, եւ մյուսը` իսկապես ձգտել դա անել եւ բախումների հանգեցնել, որը կտա այն անցանկալի արդյունքը, որ մենք տեսել ենք: Դժբախտաբար ամսի 9-ին դրան մոտ էր, արյուն թափվեց, բայց ուրախ եմ, որ զոհեր չունեցանք, նշանակում է, որ այդ ընթացքը, որը ժամանակին չի ծրագրավորվում, ամբողջովին չի վերլուծվում հերթականությունը, չի կազմակերպում շարժումը, միշտ կարող է ստացվել այնպես, որ վերջում հավաքված ժողովուրդը վերածվում է անկազմակերպ ամբոխի եւ այլեւս ինքն է թելադրում ընթացքը, այ սա ամենանցանկանալին է, որը մոտ էր ամսի 9-ին մեծ բախումների առաջացնելուն»:
Պարոն Ռուստամյանի խոսքերով, ճանապարհը հստակ է.«Պետք է գնալ հանգրվանային ճանապարհով, փոքր արդյունքներ արձանագրելու ճանապարհով, որը բացարձակապես չի նսեմացնում շարժման նշանակությունը»:
Կարդացեք նաև
Նա չի կարծում, որ ամսի 9-ին ամեն ինչ ավարտվեց, բայց վերաիմաստավորելու խնդիր կա. «Սա նույնպես դաս է, որ ցույց է տալիս, որ չի կարելի հանպատրաստից քայլեր նախաձեռնել հստակ սցենարը չունենալով եւ այդ ժամանակ ժողովրդի մեջ առաջանում է անորոշություն, շփոթ վիճակ, եւ ղեկավարության պարտավորությունն է ամեն ինչ անել, որպեսզի նման վիճակներ չառաջանան: Կարելի է դաս քաղել այս ամեն ինչից, խնդիրը պահպանել, նպատակը պահպանել եւ հասնել ժողովրդի իշխանության հաստատմանը, բայց դրան գնալ հանգրվանային ճանապարհով»:
Մեր հարցին, ապրիլի 12-ի հանրահավաքում որոշակիացվեցին պայքարի հետագա քայլերը, պարոն Ռուստամյանն ասաց. «Նորից անհանգստությունը կար, սա պետք է վերջ դրվի, որովհետեւ ժողովուրդը չի կարող անընդհատ անհասկանալի վիճակներում լինել եւ իր համար տրամաբանված ընթացք չտեսնել:
Սա մաշում է շարժումը եւ կարծում եմ` գլխավոր խնդիրը, որ այսօր պետք է լուծվի, հստակ նպատակային դարձնել եւ քայլերի հաջորդականությունը ճշտելն է»:
Մեր հարցին, ի՞նչ տեղեկություններ ունեն Ր. Հովհաննիսյանի մոսկովյան այցից, պարոն Ռուստամյանը պատասխանեց. «Մոսկովյան այցից ոչ ոք մի բան չիմացավ, երեկ ինչ-որ խոսք պետք է ասվեր, բայց չասվեց, ինչ էր պատճառը, ինչ տվեց, հարցականները մնացին: Այս հավաքը ինչ-որ մասով պայմանավորվել էր իր այցով, բայց այդպես էլ անորոշ մնաց»:
Լրագրողներից մեկի հարցին՝ հիասթափվա՞ծ եք, ասաց.
«Մենք հիասթափվելու իրավունք չունենք, Դաշնակցությունը պետք է մարդկանց հույս տա այն դեպքերում, երբ մարդկանց թվում է, թե ճանապարհ չկա եւ մեծ պարտավարություն է դա: Պարզապես դասեր քաղելու, հստակ նպատակային ծրագրեր դնելու եւ քայլ առ քայլ այդ ծրագրերը հասնելուն է վերաբերում»:
Նա նաեւ անհասկանալի համարեց, թե ինչու Րաֆֆի Հովհաննիսյանը չհամաձայնեց գլխավորել ավագանու ընդդիմության միասնական ցուցակը. «Երեք կետերը, որոնք դրվել էին, շատ մոտ էինք դրան հասնելուն: Բայց շարժումը չգիտես ինչի համարեց, որ դրա հետ կապ չունի, հարցը մտավ փակուղի… Եթե նույն Րաֆֆի Հովհաննիսյանը գլխավորեր ցուցակը, բոլորս այդ ցուցակի մեջ լինեինք եւ գնայինք հասնեինք հաղթանակի: Երեւանում ընդդիմադիր քաղաքապետ ունենալը ոչ միայն շարժման, այլեւ երկրի, ժողովրդի համար է կարեւոր»:
Արփինե ՍԻՄՈՆՅԱՆ
Ձեր չհասկացած հարցերով ուզում եք մարդկանց բա՞ն հասկացնել…
Ճիշտ է ասում Ռոստոմյանը:
Հիմա պետք չէ դատարկ տեղը ջուր ծեծել և տեղին, անտեղի միայն գովաբանել Ռաֆֆիին:
Պետք է գործողությունների հստակ ծրագիր:
Հիմա այդ ծրագրի կարևոր կետը կարող է լինել՝
ՏԻՄ ընտրություններում ընդդիմության համատեղ, համատեղ, համատեղ, համատեղ, համատեղ, համատեղ, համատեղ,
համատեղ հաղթանակը ՀՀԿ/ԲՀԿ/ՕԵԿ – ի նկատմամբ՝ ՀՀԿ-ին Դե Յուրե արգելելով ընտրություններից հետո հրապարակայնորեն իր մեծամասնություն ունենալու ստահոդ հավակնությունների մասին խոսելու «իրավունքից»:
Դա կլինի ՀՀԿ-ի իշխանազրկության գործընթացի փաստացի սկիզբը:
Ռաֆֆին միայնակ ոչինչ չի կարող անել: Ուշքի եկ Ժառանգություն: