«Գնումների հետ կապված խնդիրների առանցքը կախված է այս երկու հիմնական բացասական երեւույթներից՝ երկրի կարիքների համար ձեռք բերվող ապրանքների, աշխատանքների եւ ծառայությունների դիմաց պետությունը վճարում է դրանց իրական արժեքներից շատ ավելի մեծ գումարներ: Ապրանքների, աշխատանքների եւ ծառայությունների դիմաց դրանց իրական արժեքից ավելի մեծ վճարման դեպքում նույնիսկ պետությունը չի ստանում այն արդյունքը, որն, ի սկզբանե, ակնկալվում էր: Այսինքն՝ արդյունքը կամ ընդհանրապես չի լինում, կամ լինում է անարդյունավետ, կամ լինում է մասնակի որակով, կամ անարդյունավետ ծախս»,-այսպես ԱԺ-ում այսօր Վերահսկիչ պալատի նախագահ Իշխան Զաքարյան այսպես ներկայացրեց 2012-ի տարեկան հաշվետվությունը՝ խոսելով գնումների ոլորտի հերթական «ատկատների» մասին:
Նրա խոսքերով՝ շատ հաճախ գնումների համար անցկացվող մրցույթներում լինում է կազմակերպություն, որը տվյալ ապրանքի ոչ արտադրող է, ոչ էլ ներկրող. «Այդ դեպքում ուղղակի հարց ենք տալիս՝ ի՞նչ հիմքերով է թույլատրվել այդ ընկերության մասնակցությունը մրցույթին: Մի՞թե հնարավոր չէ նախօրոք փաստաթղթերով համոզվել՝ ունի՞ այդ կազմակերպությունը մրցույթին մասնակցելու իրավունք: Պարզվում է՝ ոչ: Շատ հաճախ նախօրոք պայմանավորված սցենարով կազմակերպվում են մրցույթներ: Նույնիսկ ունենք դեպքեր, երբ կազմակերպությունը մասնակցում է մրցույթին, մրցութային փաթեթները բացվում են, ինքը շահում է որոշ ապրանք, արտադրանք մատակարարելու իրավունքը, եւ հանկարծ հայտնաբերում ենք, որ այդ ապրանքն ինքը ներկրել է, կամ ստացել է կամ բերել է 4-5 ամիս առաջ: Այսինքն, նախօրոք ինքն արդեն գիտեր, որ այդ մրցույթում ինքը պիտի հաղթի»:
Վերահսկիչ պալատը 2012-ին այլընտրանքային ստուգումներով էլ հայտնաբերել է բազմաթիվ խախտումներ ու ռիսկեր. «Օրինակ, դատաիրավական ԾԻԳ-ը ձեռք է բերել 80 տեղեկատվական տերմինալներ՝ 369 մլն դրամով: Դատական մարմինները, ինչպես նաեւ ԾԻԳ-ը վճարահաշվարկային գործառույթներ իրականացնելու իրավասություն չունեն: Այդ տերմինալները օգտագործվում են որպես միայն տեղեկատվական տերմինալներ: Ստուգման ընթացքում պարզվել է, որ այդ տերմինալները դատաիրավական ԾԻԳ-ը ձեռք է բերել շուկայականից 185 մլն դրամով ավելի: Այսինքն, եթե իրենք գնեին շատ պարզ տիպի տեղեկատվական տերմինալ, ապա բյուջեի ծախսերից 185 մլն դրամ կարողանալու էինք խնայել»:
Կարդացեք նաև
Հռիփսիմե ՋԵԲԵՋՅԱՆ
