Երեկ երեկոյան «Ոսկե ծիրան» 10-րդ միջազգային կինոփառատոնի կազմակերպիչները հանդիպում էին կազմակերպել ավստրիացի անվանի կինոռեժիսոր Ուլրիխ Զայդլի հետ: Ցուցադրվեց նաեւ նրա կինոեռագրության առաջին՝ «Դրախտ.Սեր» ֆիլմը:
«Ոսկե ծիրանի» կողմից համաշխարհային կինոյում ունեցած ներդրումի համար ստանալով «Համաշխարհային կինոյի վարպետ» մրցանակը, Զայդլը կես կատակ-կես լուրջ ասաց. «Ինձ դուր է գալիս լինել Հայաստանում, այս դահլիճում, որտեղ այսքան մեծ թվով հանդիսատես է հավաքված: Ընդհանրապես Հայաստանում բախտս բերում է: Մի քանի տարի առաջ ստացել եմ «Ոսկե ծիրանի» մրցանակը, երբ Հայաստանում չէի: Այսօր ստացա այս մրցանակը: Հույս ունեմ, որ այդպես էլ կշարունակվի»:
Խոսելով իր եռագրության եւ մասնավորապես դրա առաջին ֆիլմի մասին աշխարհահռչակ, նաեւ սկանդալային կինոռեժիսորը նշեց. «Իմ եռագրությունը հետաքրքիր ճանապարհ է անցել: Սկզբում մտածում էի մեկ ֆիլմ նկարել, որը պետք է բաղկացած լինի երեք դրվագից, որոնցից յուրաքանչյուրում որեւէ կին է՝ իր ձգտումներով, սպասելիքներով ու երազներով: Բայց այնպես ստացվեց, որ չորս տարվա ընթացքում առաջացան երեք կինոնկարներ»:
Նա հաճելի դիտում ցանկանալով հանդիսատեսին ասելով. «Մաղթում եմ, որ մի քիչ դուրս գաք ձեր հավասարակշռությունից»:
Կարդացեք նաև
Հիշեցնենք, որ Ուլրիխ Զայդլի «Դրախտ. Սերը» պատմում է 50-ամյա մի կնոջ մասին, որն ուղեւորվում է Քենիա՝ որպես սեքս-զբոսաշրջիկ: Նա փորձում է վճարովի սեռական ծառայություններ մատուցող սեւամորթ տղաների հետ ճաշակել սիրո քաղցրությունը, սակայն սիրո վայելքի գլխապտույտը դեռեւս հեռու է դրախտ կոչվածից. այդպես հոգին չի լցվում:
Գոհար ՀԱԿՈԲՅԱՆ
