Այսօր Գյումրու քաղաքապետարանում տեղի է ունեցել համայնքային ծառայողի կրտսեր մասնագետների թափուր պաշտոնների համար հայտարարված հերթական մրցույթը, որը լրագրողներին ապշեցրել է մասնակիցների աննախադեպ թվով. 10 տեղի համար պայքարել են ուղիղ 150 հոգի: Այսինքն՝ միջինը մեկ տեղի համար 10 հոգի են մրցել:
Սա, ի դեպ, փայլուն ապացույցն է Գյումրիում առկա գործազրկության մակարդակի: Բարձրագույն կրթությամբ երիտասարդները այնպիսի մի անճար վիճակում են հայտնվել, որ ամեն գնով պատրաստ են քաղաքապետարանում աշխատանքի տեղավորվել, թեկուզև ցածր աշխատավարձով` 60-70 հազար դրամով, որը անգամ որպես ջեբի փող չի բավարարի:
Մասնակիցների թիվն այնքան մեծ էր, որ մրցութային հանձնաժողովները ժամերով ընթերցում ու հա ընթերցում էին մասնակիցների անուն-ազգանունները:
Ինչո՞վ է պայմանավորված նման մրցակցությունը, Aravot.am-ը այս թեմայի շուրջ զրուցեց Սամվել Բալասանյանի մամլո խոսնակ Զոհրապ Եգանյանի հետ:
Կարդացեք նաև
«Բուհերի շատ լինելու պատճառով շատ են դիպլոմներ ունեցողները, դա փաստ է, ամբողջ Հայաստանում է այդպես, բացի այդ, քանի որ կրտսեր պաշտոնների համար մասնագիտական աշխատանքային ստաժը պարտադիր չէ, դա մեկ, մյուսն էլ` կա վստահություն քաղաքապետարանի կողմից կազմակերպվող քննությունների անաչառության նկատմամբ:
Դիմորդների քանակը բավական բարձր է, միջինը մեկ տեղի համար պայքարում էին 10 հոգի, ամենաբարձր մրցակցությունը արտաքին հարաբերությունների, տուրիզմի և արարողակարգի բաժնի թափուր աշխատատեղերի համար էր, մասնակցում էին նաև այլ` պետեկամուտների, կրթության բաժինների թափուր տեղերի համար: Ինչպես միշտ, մրցույթը թափանցիկ անցկացվեց` լրատվամիջոցների ներկայությամբ, այս պահին ընթանում է մրցույթի բանավոր փուլը, գրավորն ավարտվել է », -ասաց Զոհրապ Եգանյանը:
Թե 10 հոգուց ո՞ր մեկը`ո՞ւմ ծանոթ-բարեկամը կամ, միգուցե ծանոթ չունեցող ու արժանի կադրը կանցնի իր նախընտրած աշխատանքին, կերևա առաջիկայում: Գյումրին փոքր քաղաք է, որտեղ այս հարցերը անմիջապես հրապարակայնացնում են ու խոսում:
Նունե ԱՐԵՎՇԱՏՅԱՆ
150 բաժանած 10 հավասար է միջինը մեկ տեղի համար 15 հոգի: Տարրական թվաբանություն
Ջեբի փող… միգուցե գրպանի փող