Ինչպես տեղեկացրել ենք այսօր Գյումրի էր ժամանել ԲՀԿ առաջնորդ Գագիկ Ծառուկյանը: Վերջինս եկել էր իր միջոցներով վերակառուցվող Գյումրու օլիմպիական հերթափոխի պետական քոլեջում կատարվող շինաշխատանքները ևս մեկ անգամ վերահսկելու ու նաև «Գյումրին 2013 թվականի ԱՊՀ մշակութային մայրաքաղաք»-ի միջոցառումները կազմակերպած անձանց ու նաև դրանք լուսաբանած ԶԼՄ-ներին թվանշանային հեռուստացույցեր նվիրելու:
Մինչ պարոն Ծառուկյանը կհասներ օլիմպիական հերթափոխի պետական քոլեջ, նրանից շուտ այնտեղ էին հավաքվել սոցիալապես անապահով կանայք, ովքեր ամեն անգամ ԲՀԿ առաջնորդի ժամանելու լուրը լսելուն պես շտապում են նրան ընդառաջ:
Նշենք, որ այսօր Գյումրիում ձմռան ամենացուրտ օրն է, ինչպես ասում են` մարդ իր շանը դուրս չի թողնի, այդուհանդերձ դա չէր խանգարել գյումրեցի տատիկներին հասնել քաղաքի ծայրամաս` պարոն Ծառուկյանից գումար խնդրելու:
Կարդացեք նաև
ԲՀԿ առաջնորդին առաջինը դիմավորեցին այս կանայք. նրանցից մեկը համառորեն գումար պահանջեց` բացականչելով. «Ես քո թագավոր ջանին մեռնիմ, էս եկե՞լ ես, դե ինձ օգնի»:
Վերջինիս Գագիկ Ծառուկյանի ճանապարհից փորձում էին հետ դարձնել նրան ուղեկցող Գյումրու ԲՀԿ-ական քաղաքապետ Սամվել Բալասանյանն ու ԲՀԿ-ական պատգամավոր Մարտուն Գրիգորյանը: Քաղաքապետն անգամ նեղվեց` ասելով. «Հերիք եղավ, զզվացրեցիր էլի»: Սակայն համառ տատիկին համոզել չհաջողվեց, նա Գագիկ Ծառուկյանին գրեթե կպած քայլում էր, ու ԲՀԿ առաջնորդին լքեց՝ ծրարով գումարը ստանալուն պես:
Նշենք, որ նա Գյումրիում հայտնի Լիզա տատիկն է, որին գյումրեցիները ճանաչում են որպես մուրացկանությամբ հարստացած անձի, ով Ռոբերտ Քոչարյանին ու Սերժ Սարգսյանին ևս «թագավոր ախպեր» անվանելով ու նրանցից փող վերցնելով` կարողացել է Գյումրու կենտրոնական շուկայում բիզնես հիմնել:
Գագիկ Ծառուկյանի ու Լիզա տատիկի հանդիպման մանրամասները` տեսանյութում:
Նունե ԱՐԵՎՇԱՏՅԱՆ
Գագիկ Ծառուկյանը պատրաստակամ է օգնել բոլորին` անկախ ամեն ինչից