«Քաղաքական մեծամասնության լռությունը բավականին խոսուն լռություն է: Այդ ընդվզումը կա հասարակության մեջ, քանի որ հանրությանը հետաքրքրող հարցերի մասին է խոսքը »,- այսօր խորհրդարանական ճեպազրույցների ժամանակ հայտարարեց «Ժառանգություն» խմբակցության ղեկավար Ռուբեն Հակոբյանը`նկատի ունենալով անցած քառօրյայում քննարկված հարցերը, մասնավորաբար, «գազի հարցով» հանձնաժողովի ստեղծման քննարկումները եւ իշխանության պասիվ մասնակցությունը դրանց:
Բանախոսը փաստեց, որ իշխանություններն այդպես էլ չպատասխանեցին այն հարցերին, թե ինչո՞ւ է գազային համաձայնագրերի դեպքում խախտվել ՀՀ Սահմանադրությունը, Պետական բյուջեի մասին եւ Պետական պարտքի մասին օրենքները:
Լրագրողներից մեկի դիտարկմանը, ինչպե՞ս է գնահատում ԱԺ նախագահ Հովիկ Աբրահամյանի այն հայտարարությանը, թե գազի հարցով ԱԺ ժամանակավոր հանձնաժողով այնուհանդերձ ստեղծվելու է`մեծամասնության նախաձեռնությամբ եւ բոլոր հարցերի պատասխանները տրվելու են, Ռուբեն Հակոբյանը պատասխանեց. «Ես քմահաճույք եմ տեսնում այստեղ: Եթե նույն հանձնաժողովն է լինելու, ինչո՞ւ մերժեցին մեր առաջարկը: Բայց պատրաստ ենք աշխատել»: Հակոբյանը, սակայն, կարեւոր է համարում թե ինչ բովանդակություն է ունենալու մեծամասնության ժամանակավոր հանձնաժողովի նախագիծը:
Հարցին`որքանո՞վ են անկեղծ ընդդիմադիր ուժերի ցանկությունները`երկրում իշխանափոխություն անցկացնելու հարցում, Ռուբեն Հակոբյանը պատասխանեց, որ իր կարծիքով երկրում կարգուկանոն հաստատելու միակ ճանապարհը`Հայաստանում ամբողջական իշխանափոխությունն է, ամբողջ համակարգի փոփոխությունը: Չորս ոչ իշխանական ուժերն, ըստ նրա, համամիտ են այս գնահատականի հետ, միայն իշխանությունն է ասում՝ մենք կառուցում ենք ապահով Հայաստան: Նա վստահ է՝ չորս իշխանական ուժերին կիմանան նաև ոչ խորհրդարանական ուժերը, քաղաքացիական հասարակությունը, և այդ դեպքում իշխանափոխությունը հնարավոր կլինի:
Կարդացեք նաև
Ճշտող հարցին`գործընկերների անկեղծության չափաբաժնի մասով, ասաց. «Չորսը ներկա կլինեն`կհարցնեք, ես չեմ ուզում ասել: Մենք պատրաստ ենք լայն կոնսոլիդացիայի: «Ժառանգությունն» անում է ամեն ինչ, որ այդ կոնսոլիդացիան կայանա, օրակարգում չի դրվի այնպիսի հարց, որը կարող է տարաձայնությունների տեղիք լինել այս չորս ուժերի միջեւ»:
«Ժառանգություն» խմբակցության ղեկավարը նաև ՀՀ քաղաքացիներին կոչ արեց դիմել դատարաններ՝ եթե առանց նրանց իմացության աշխատավարձերից պարտադիր կենսաթոշակային վճարներ կպահվեն:
Նելլի ԳՐԻԳՈՐՅԱՆ
