Աշխարհի չեմպիոն Նազիկ Ավդալյանը նշանակվել է ծանրամարտի Հայաստանի աղջիկների պատանեկան ու երիտասարդական հավաքականների մարզիչ: Aravot.am-ի հարցին, թե դա նշանակո՞ւմ է, արդյոք, որ նա հրաժարվել է մեծ սպորտ վերադառնալու մտադրությունից, Նազիկը պատասխանեց. «Բժիշկներն ասում են, որ մեծ ծանրաբեռնվածություններով մարզվելը կարող է ազդել վնասվածքիս վրա եւ վտանգ ներկայացնել առողջությանս: Սակայն հույսս չեմ կորցնում: Ուզում եմ հավատալ, որ մի օր, այնուամենայնիվ, կմտնեմ մեծ մրցահարթակ»:
Նազիկը ներկայացրեց նաեւ իր մարզչական առաջիկա ծրագրերը: «Մարտի 16-ից պատանիների հետ ուսումնամարզական հավաք կանցկացնենք Ծաղկաձորում, որին կմասնակցի 10 մարզուհի: Հավաքից հետո կմեկնենք Լեհաստան` Եվրոպայի պատանեկան առաջնություն: Դրանից հետո կսկսեմ աշխատել նաեւ երիտասարդների հետ», – ասաց Նազիկ Ավդալյանը:
Աշոտ ՀԱԿՈԲՅԱՆ