Ուկրաինայի խորհրդարանի մոտ վերսկսվել է «Պռավի սեկտոր» աջ ծայրահեղական խմբավորման ցույցը: Այնտեղ են հավաքվել նաև ակտիվիստներ, որոնք բռնության դեմ կոչերով են հանդես գալիս: Ինչպես փոխանցում է «Ունիան»-ը, հղում անելով «Ազատություն ռադիոկայան»-ի ուկրաինական ծառայությանը, ակտիվիստների ձեռքին պաստառներ են «բռնություն անողը Պուտինին է օգնում», «Պռավի սեկտոր, գնա քեզ խելք առ» գրություններով:
Դրությունը Ռադայի մոտ հանդարտ է: Հավաքվածները՝ մոտ մի քանի հարյուր մարդ, ժամանակ առ ժամանակ վանկարկում են:
Մարտի 27-ին հազարավոր մարդիկ՝ հիմնականում «Պռավի սեկտոր»-ի ներկայացուցիչները, հավաքվել էին խորհրդարանի մոտ և անկարգություններ էին անում՝ պահանջելով ներքին գործերի նախարար Արսեն Ավակովի հրաժարականը՝ կապված իրենց առաջնորդներից մեկի՝ Ալեքսանդր Մուզիչկոյի (Սաշկո Բիլի) սպանության հետ:
Պատրաստեց Հովհաննես ԻՇԽԱՆՅԱՆԸ
