«Երբ որ քաղաքական եւ զինվորական պահը ցույց կտա, որ մենք ապահով կապրենք մեր պապենական հողի վրա, անմիջապես կվերադառնանք»,- այսօր՝ ապրիլի 4-ին, Լաթաքիայից ուղիղ տեսազանգի միջոցով հայտնեց Սփյուռքահայության շտապ օգնության գործադիր մարմնի անդամ Կարո Մանճիկյանը:
Նրա խոսքերով՝ իրենք սահմանի մյուս կողմում՝ Թուրքիայի տարածքում, հավատարիմ բարեկամներ ունեն, որոնք իրենց տեղյակ են պահել, որ իրենց կահույքը թուրքական շուկաներում են վաճառում.
«Ավտոմեքենաներով օրնիբուն կտեղափոխեն մեր տների կահ-կարասիները կա՛մ կսեփականացնեն, կա՛մ կծախեն: Այսինքն՝ այն ինչ-որ 100 տարի առաջ եղած էր, կրկնվում է: Թալանը, կողոպուտը իրենց պետության կողմից հովանավորված քաղաքականություն է, որպեսզի տնտեսական վիճակը վատթարացնելով՝ իրենց դարավոր երազը իրականացնեն՝ սահմանամերձ այս գոտին, որ հայերով էր բնակեցված, հայաթափ անեն»:
Նա նշեց նաեւ, որ առաջին օրվա ընթացքում շուրջ 300 քեսաբցի էր բնակվում Լաթաքիայի Սբ Աստվածածին եկեղեցում, որոնց կեսը՝ շուրջ 150 հոգի, գտել է իր համար այլ ժամանակավոր կացարաններ, իսկ մյուս կեսը շարունակում է ապրել եկեղեցուն կից սրահում.
Կարդացեք նաև
«Առօրյա հերթականության ճաշ, նախաճաշ, ընթրիք, նախընթրիք կմատուցվի իրենց: Ամբողջ թաղի հայ եւ ոչ հայ մեր դրացիների եւ հարազատների գուրգուրանքի առարկան են: Փորձում ենք իրենց գաղթականի վիճակից դուրս բերել, որովհետեւ այդ հոգեվիճակը կկոտրի իրենց»:
Ամի ՉԻՉԱԿՅԱՆ