Շեյլա Դիլենիի «Մեղրի համը» պիեսը, որը նախորդ դարի 60-70-ականներին մեծ հնչեղության էր արժանացել, այժմ յուրովի է ներկայացվում հայ հանդիսատեսին: Դրամայի գլխավոր կերպարի՝ Ջոյի դերակատարն է Երևանի պատանի հանդիսատեսի թատրոնի դերասանուհի Մարիամ Ղազանչյանը, ով սիրով զրուցեց մեզ հետ:
– Պիեսի բեմադրության աշխատանքների ժամանակ Ձեզ հատկապես ի՞նչը գրավեց:
– Պիեսին ծանոթ չէի նախկինում, մինչեւ ռեժիսոր Գոռ Սարգսյանի բեմադրելը: Երբ իմացա, որ Ջո պետք է խաղամ, կարդացի դրաման ու հենց առաջին հայացքից սիրահարվեցի կերպարին: Իմ կյանքում նման բան երբեւիցե չէր եղել: Միանգամից սկսեցինք աշխատանքները:
– Հոգեբանական առումով Ջոն բավականին ուշագրավ կերպար է. կա՞ն հատկանիշներ, որոնք բնորոշ են նաեւ Ձեր խառնվածքին:
– Առհասարակ, յուրաքանչյուր կերպար մարմնավորելիս, անկախ քեզանից սկսում ես գտնել նմանություններ: Առաջին անգամ, երբ կարդացի գործը, մտածեցի՝ ինչպես պետք է իրեն վերլուծեմ: Ընդհանրությունները միանշանակ են, քանի որ Ջոն չափազանց զգացմունքային տարիքում է՝ 17-18 տարեկան: Անցումային այդ շրջանում բոլորս էլ փորձում ենք ինքնահաստատվել, սիրահարվում ենք եւ դառնում հուզվող, նյարդային:
– Հանդիսականը պետք է հասկանա ներկայացման գերխնդիրը, ինչը ոչ միշտ է հեշտ…
– Բարդ է… երբեք չգիտես՝ ի՞նչ հանդիսատեսի առաջ ես խաղալու, չգիտես՝ որքանով է գրագետ, զարգացած, արդյոք ներկայացմանը գալուց առաջ գոնե համացանցում փնտրել- կարդացե՞լ է պիեսի կարճ բովանդակությունը: Չէ՞ որ պետք է հասկանա՝ ռեժիսորն ի՞նչ է փոխել, ո՞րն է ասելիքը: Կարեւոր են դերասանի եւ հանդիսատեսի միջև հաղորդակցությունը, արտիստի ճիշտ մոտեցումն իր գործին: Եթե դրանք եղան, ապա ներկայացումը հաջողված կլինի:
– Ինչպե՞ս է կատարվում Ջոյի կերպարից անցումը դեպի Մարիամ:
– Ինձ համար Ջոն նոր հայտնություն էր, ներկայացումից հետո մինչեւ հաջորդ օրը տպավորության տակ եմ լինում: Հատուկ դժվարություններ չկան, փորձում եմ տիրապետել հույզերը կառավարելու վարպետությանը:
– Եթե Դուք լինեիք հեղինակի փոխարեն, ինչպե՞ս կփոխեիք գործողությունների ընթացքը, Ջոյի ճակատագիրն ի՞նչ ուղով կտանեիք:
-Վստահ չեմ կարող ասել, թեեւ բեմադրության մեջ ավարտն այլ է, բայց փոփոխություն կատարելու դեպքում, 18-ամյա աղջիկը, որը դժվարին էտապներ անցավ առանց մոր, հետագա կյանքը կշարունակեր մենակ…
Զրուցեց ՇՈՒՇԱՆ ԻՍՊԻՐՅԱՆԸ
«Առավոտ» օրաթերթ
Հեղինակի անունը՝ Շեյլա Դիլանի, սեռական հոլովով՝ Շեյլա Դիլանիի…
Շնորհակալություն: Ուղղումն արված է