ՀՀԿ երիտասարդական կազմակերպության անդամներն ապրիլի 26-ին մասնակցել են ավանդական դարձած ծաղկահավաքին, որն արդեն 5-րդ տարին անցկացվում է Ծիծեռնակաբերդի բարձունքում։
Ցեղասպանության զոհերի հուշահամալիրի անմար կրակի մոտ բերված ծաղիկները խնամքով հավաքվել են, ծաղկաթերթիկներն առանձնացվել ցողուններից, որոնք հետագայում կօգտագործվեն թղթի վերամշակման համար: Հայոց ցեղասպանության թանգարան-ինստիտուտն այդ վերամշակված թղթերն օգտագործում է բացիկներ, հրավիրատոմսեր և նամակներ պատրաստելու նպատակով: Իսկ ցողուններից պատրաստվում է պարարտախառնուրդ՝ այգիների մշակման համար:
Այս գեղեցիկ նախաձեռնության հեղինակներն են Վայրի բնության և մշակութային արժեքների պահպանման հիմնադրամը, ՎիվաՍել-ՄՏՍ-ն ու Հայոց ցեղասպանության թանգարան-ինստիտուտը։
Ծաղկահավաքին մասնակցել են կամավորներ, մի շարք ընկերությունների ներկայացուցիչներ, դպրոցականներ, ուսանողներ։
ՀՀԿ երիտասարդական կազմակերպության անդամ Արմինե Բարսեղյանը նոր կյանք ստացած ծաղիկները համեմատում է հայ ժողովրդի հետ. «Ծաղկահավաքը խորհրդանշում է մեր պատմությունը։ Ինչպես այս ծաղիկների թերթերը, այնպես էլ հայ ժողովուրդը վերածնվում, նոր կյանք է ստանում արհավիրքից հետո։ Նման միջոցառումները նաև համախմբում են երիտասարդներին, նրանց մեջ սերմանում սեր բնության, գեղեցիկի նկատմամբ»։
ՀՀԿ երիտասարդական կազմակերպություն
