Կառավարման փորձագետ Հարություն Մեսրոբյանը Aravot.am-ի հետ զրույցում անդրադառնալով ԱԺ-ում երեկ տեղի ունեցած իրարանցմանը՝ նշեց. «Չեմ կարծում, որ խորհրդարանում որակապես նոր բան է կատարվում: Նման վիճակը մի քիչ այլ ձեւով, մի քիչ այլ խոսքերով, այլ թեմաների շուրջ պարբերաբար լինում է արդեն մի քանի տարի, ու չեմ կարծում, թե երբեւէ որեւէ դրական շարունակություն կլինի: Մարդկանց աշխատելու ոճը՝ ռազմավարությունն ու մարտավարությունը, ըստ էության, չի փոխվել, պարզապես ձեւերը դարձել են ավելի բազմազան: Նախկինում էլ շատերը չեն թաքցրել իրենց բիզնեսները, չնայած պարբերաբար մամուլում եւ այլ տեղեր խոսվել է այն մասին, երբ օլիգարխներն իրենց բիզնեսները մոտիկների եւ հարազատների վրա էին գցում, ասելով՝ տղայինս է, կնոջս բիզնեսն է …»:
Ինչ վերաբերում է նոր կառավարության կազմին, կառավարման փորձագետի ձեւակերպմամբ, Հայաստանում զուտ անձերի փոփոխություններով անհնար է որակական արդյունք սպասել. «Ըստ էության, պետական կառավարման համակարգը նույնն է, նախկին կառավարման համակարգը ընդամենը հարմարեցվել է ներկա պայմաններին եւ արդեն 23 տարի քարշ են տալիս հին կառավարման համակարգը: Օլիգարխիկ կառավարման համակարգի ժամանակ, այսինքն՝ այն, ինչ մենք ունենք, անհնար է հաջողություն գրանցել եւ կրախ չունենալ…Ասածս այն է, որ ինչ կատարվում է նախախորհրդարանում, շատ լավ դրվագներ են՝ բազմասերիանոց սերիալից: Ամեն անգամ տեսնելով հերթական սերիան, հասկանում ենք, որ էությունը չի փոխվում, բայց շարունակում ենք հետաքրքրվել՝ իսկ ի՞նչ կլինի հաջորդ սերիայում: Ինձ թվում է՝ ժամանակն է թարգելու սուտ սպասումները»:
Գոհար ՀԱԿՈԲՅԱՆ
“Ասածս այն է, որ ինչ կատարվում է նախախորհրդարանում, շատ…”
Հարգելի լրագրող, երևի ոչ թո ՆԱԽԱխորհրդարանում, այլ խորհրդարանու՞մ։
Թե չէ թեմայից դուրս է ստացվում։
Հարգելի Կարապետ, ես նորից լսեցի ձայնագրությունը, հստակ ՆԱԽԱԽՈՐՀՐԴԱՐԱՆ է ասում պարոն Մեսրոբյանը: Հավանաբար նկատի ունի ոչ թե Նախախորհրդարան քաղաքացիական շարժումը, այլ երեւի մինչ խորհրդարանի ձեւավորվելը ընթացող գործընթացները, մարդկանց ակնկալիքներն ու չարդարացած հույսերը:
Հարգանքներս
Շնորհակալություն ճշտման համար