Ամերիկացի հայտնի քաղաքագետ Ջորջ Ֆրիդմանի կարծիքով, Ադրբեջանը կարող է խեղդվել իր գազով և նավթով, եթե Ռուսաստանը կարողանա իր վերահսկողության տակ վերցնել Վրաստանով անցնող խողովակաշարերը:
Լեհական «Գազեչե Վիբարչե» պարբերականին տված հարցազրույցում, որը թարգմանել է «Հաքքին.ազ»-ը, Ֆրիդմանն ասել է, որ ամենահավանական սցենարն այն է, որ Լատվիայի և Լիտվայի ռուսները ուզենան միանալ Ռուսաստանին, բայց, քանի որ խոսքը ՆԱՏՕ անդամ երկրների մասին է, Պուտինն այդ տարբերակին կմոտենա ամենավերջում. «Ուկրաինայի ճգնաժամը որոշ ժամանակ անց կհարթվի: Դա ուզում է և՛ Ռուսաստանը, և՛ Արևմուտքը: Այդ ժամանակ Պուտինն իր առջև այլ նպատակներ կդնի», – շարունակում է քաղաքագետ,- «Առաջին հերթին նա փորձարկումներ կանի Մոլդովայի և Վրաստանի հետ: Վրաստանն Ադրբեջանի համար գազի և նավթի տարանցիկ գոտի է: Ու եթե Ռուսաստանին հաջողվի իր վերահսկողության տակ վերցնել [Վրաստանի] խողովակաշարերը, Ադրբեջանը կարող է խեղդվել իր գազով և նավթով»:
Ըստ նրա, Պուտինը զորք չի մտցնի Վրաստան, այլ չեկիստի պես կգործի՝ ապատեղեկատվություն տարածելով, սպառնալիքներ տեղալով, քաղաքական գործիչներին կաշառելով ու հատուկ ստորաբաժանումներ ուղարկելով: Ֆրիդմանը նշել է, որ թեև Պուտինը խաղաքարտերն այնքան էլ լավը չեն, սակայն նա կարողանում է դրանցով խաղալ ու մինչև հիմա հաղթանակած է դուրս գալիս:
Պատրաստեց Հովհաննես ԻՇԽԱՆՅԱՆԸ
