Հայաստանի հանրային խորհուրդը կոչով դիմել էր Հանրային խորհուրդների միջազգային կառույցի 70-ից ավելի երկրների հանրային խորհուրդներին` Քեսաբի իրադարձությունների վերաբերյալ: Այսօր Հանրային խորհրդի լիագումար նիստում Միջազգային հարցերի հանձնաժողովի նախագահ Ռուբեն Սաֆրաստյանն ասաց, որ պատասխաններ են ստացվել: Պատասխանել է, մասնավորաբար, Բրազիլիայի հանրային խորհուրդը, որը ղեկավարում է այդ երկրի նախագահը: Պատասխան նամակում կարեկցանք է արտահայտվում հայ ժողովրդի նկատմամբ` այդ ծանր դեպքերի կապակցությամբ, միջազգային հանրությանը կոչ է արվում քննադատություն հնչեցնել Սիրիայում մարդու իրավունքների խախտումների վերաբերյալ:
Հայաստանի նամակին արձագանքել է նաեւ Ռուսաստանի հասարակական պալատի քարտուղար, Համաշխարհային հանրային խորհրդի ասոցիացիայի նախագահ, ակադեմիկոս Վելիխովը: ՌԴ հանրային պալատը նախատեսում է իրականացնել հանրային քննարկումներ Սիրիայում ստեղծված իրադրությունների ու ապստամբների կողմից իրականացվող հանցագործությունների մասին: Վելիխովն ակնկալում է նաեւ ՀՀ հանրային խորհրդի օժանդակությունն այդ քննարկումներում:
Այսօր ՀՀ հանրային խորհուրդը որոշեց, որ հինգ հոգանոց խմբով կմասնակցի միջազգային այդ հավաքին, կներկայացնի նաեւ համապատասխան տեղեկատվական նյութեր, կմասնակցի նաեւ համապատասխան բանաձեւի պատրաստմանը: Խումբը կղեկավարի Միջազգային հարցերի հանձնաժողովի նախագահ Ռուբեն Սաֆրաստյանը:
Կարդացեք նաև
Նելլի ԳՐԻԳՈՐՅԱՆ
