Ռուսաստանի նախագահ Վլադիմիր Պուտինի ու Գերմանիայի կանցլեր Անգելա Մերկելի Դովիլում մեկ ժամ տևած հանդիպումը ամբողջովին նվիրվել է Ուկրաինայի հարցին, հայտնել է ՌԴ նախագահի մամուլի խոսնակ Դմիտրի Պեսկովը, փոխանցում է «ԻՏԱՌ-ՏԱՍՍ»-ը:
«Պուտինն ու Մերկելը կենտրոնացել էին ուկրաինական գործերի, ուկրաինական հակամարտության կարգավորման վրա», – ասել է Պեսկովը, որը ներկա էր հունիսի 6-ին կայացած այդ հանդիպմանը:
Պատասխանելով հարցին, թե արդյոք կողմերը քննարկել են Ուկրաինայի հարցում Բեռլինի և Մոսկվայի անհամաձայնությունները, խոսնակը պատասխանել է. «Զրույցը հենց դրան էր նվիրված»:
Ավելի վաղ, Փարիզում Պուտինը հանդիպել էր Ֆրանսիայի նախագահ Ֆրանսուա Օլանդի հետ:
Կարդացեք նաև
«Վլադիմիր Պուտինը և Ֆրանսուա Օլանդը բավական կառուցողական խոսակցություն են վարել», – ասել է Պեսկովը՝ նշելով, որ բացի երկկողմ հարաբերություններից, նրանք մանրամասնորեն քննարկել են Ուկրաինայի հակամարտության կարգավորման հարցը:
Հունիսի 5-ին Պուտինը հանդիպել է նաև Մեծ Բրիտանիայի վարչապետ Դեյվիդ Քեմերոնի հետ: Լրագրողները նկատել են, որ հանդիպումը սկսվել է առանց ավանդական ձեռքսեղմման, սակայն Պեսկովը հայտնել է, որ առաջնորդները հանդիպումից հետո են ձեռք սեղմել: Խոսնակը հայտնել է, որ կողմերը քննարկել են ռուս-բրիտանական երկխոսության թարմացման և Ուկրաինայի հակամարտության հարցերը:
Երկրների ղեկավարները Ֆրանսիայում են գտնվում Երկրորդ համաշխարհային պատերազմի ժամանակ Նորմանդիայում դաշնակիցների զորքերի վայրէջքի 70-ամյակին նվիրված տոնակատարություններին մասնակցելու համար:
Պատրաստեց Հովհաննես ԻՇԽԱՆՅԱՆԸ
