Այսօր «Առավոտը» ՀՀ պաշտպանության նախարար Սեյրան Օհանյանին խնդրեց մեկնաբանել երեկ «Թրանսփերենսի ինթերնեյշնլ» կազմակերպության ներկայացրած «Հայաստանի պաշտպանության հաստատություններում կոռուպցիոն ռիսկերի գնահատումը», համաձայն որի՝ Հայաստանն իր արդյունքներով հայտնվել է «D-» խմբում, ինչը նշանակում է, որ կոռուպցիոն ռիսկերը բարձր են:
Պաշտպանության նախարարը կտրականապես համաձայն չէր այդ գնահատականի հետ: Նա ասաց. «Ուզում եմ տեղեկացնել ձեզ, որ Հայաստանի զինված ուժերի ղեկավարությունը եւ անձամբ ես այս վերջին տարիների ընթացքում բավականին լուրջ աշխատանք ենք տանում կոռուպցիայի եւ կաշառակերության դեմ պայքարի առումով: Երեւի թե ուրիշ այլ կառույցներում այդքան ակնհայտ չեն երեւում այդ արդյունքները, որքան մեզ մոտ են բացահայտումներ իրականացվում: Իմ ղեկավարության ժամանակ լուրջ աշխատանքի արդյունքում հասել ենք նրան, որ պատրաստել ենք բարեվարքության ամրապնդման եւ կոռուպցիայի դեմ պայքարի ծրագիր: Մեր սպաները, մեր ղեկավարները ազնվության թեստեր են հանձնում, որի շնորհիվ մենք եկել ենք այնպիսի իրավիճակի, որ կոռուպցիոն ռիսկերը, ընդհակառակը, բանակում ամենաքիչն են: Մեր գնումների գործընթացի ստուգման ժամանակ Վերահսկիչ պալատը գնահատեց, որ մեզ մոտ գնումների 87%-ը զերծ են կոռուպցիոն ռիսկերից, մնացած 13%-ը դեռ վիճելի են, որովհետեւ մենք ապացուցում ենք, որ դրանք ընթացել են մրցույթների անցկացման համապատասխան ընթացակարգերի շրջանակներում: Ես գտնում եմ, որ այդ տվյալները ճիշտ չեն»:
Մելանյա ԲԱՐՍԵՂՅԱՆ
